ХОҚ ўзининг киберспорт қўмитаси фаолиятини тўхтатди

Халқаро Олимпия қўмитаси (ХОҚ) ўзининг киберспорт қўмитаси фаолиятини тўхтатди. Бу ҳақда “Livedoor” нашри хабар берди.

Манбага кўра, жорий йилнинг январь ойида ХОҚ президенти Кирсти Ковентри киберспорт қўмитасига мактуб йўллаб, ушбу йўналишни ривожлантириш бўйича ёндашувни қайта кўриб чиқишни таклиф қилган. У киберспортни ривожлантириш масъулиятини шахсан ўз зиммасига олаётганини билдирган. Ковентрининг фикрича, Олимпия ҳаракатининг кейинги босқичи умумий стратегияга тўлиқ мос келадиган, янада кенг қамровли ёндашувни талаб қилади.

Аввалроқ, Томас Бах раҳбарлиги даврида ХОҚ киберспорт турнирларини ташкил этган ва уни келажакда Олимпия ўйинлари дастурига киритиш имкониятини кўриб чиққан эди. Бироқ нашрнинг ёзишича, Ковентри ҳозирда анъанавий спорт турларига устувор аҳамият қаратмоқда.

2024 йилда ХОҚ 2025 йилда Саудия Арабистонида ўтказилиши режалаштирилган илк Олимпия киберспорт ўйинларини эълон қилган эди. Кейинчалик мусобақа 2027 йилга қолдирилди. 2025 йилнинг октябрь ойида эса ХОҚ Саудия Арабистони билан тузилган шартномани бекор қилиб, лойиҳани бутунлай тўхтатгани маълум қилинди.

Маълумот учун, 2023 йил июнь ойида Сингапурда тарихда илк бор Олимпия киберспорт ҳафталиги ўтказилган. Унда 500 мингдан ортиқ томошабин иштирок этган, трансляцияларни эса 6 миллионга яқин киши кузатган.