Германия канцлери Пекинда: кун тартибида савдо ва геосиёсат

Бугун, 25 февраль куни Германия канцлери Фридрих Мерц Хитойга уч кунлик расмий ташриф билан борди. Бу ҳақда “Синьхуа” хабар берди.

Агентликка кўра, Мерцни Пекин аэропортида Хитой Бош божхона бошқармаси раҳбари Сун Мейжун кутиб олган. Ташриф давомида канцлер Хитой Давлат кенгаши бош вазири Ли Цян ва Хитой Раиси Си Цзиньпин билан учрашади.

Пекинда Мерц собиқ император қароргоҳи – Тақиқланган саройга ташриф буюради, шунингдек, Германиянинг Mercedes-Benz вa Siemens Energy компаниялари вакиллари билан учрашиши режалаштирилган. Ханчжоуда эса у Хитойнинг Unitree робототехника компанияси бош офисига боради.

Ташриф чоғида канцлерга Германия бизнес доиралари вакилларидан иборат катта делегация ҳамроҳлик қилиши кутилмоқда. Иқтисодий ҳамкорлик масалалари кун тартибида асосий ўринни эгаллайди.

Германия учун Хитой билан барқарор иқтисодий алоқаларни сақлаб қолиш муҳим аҳамият касб этмоқда. Бунга АҚШ Президенти Дональд Трампнинг тариф сиёсати сабаб юзага келган савдо ноаниқликлари ҳам таъсир қилмоқда.

Шунингдек, ташриф давомида хавфсизлик, геосиёсат, савдо, инсон ҳуқуқлари ҳамда Россия-Украина можароси масалалари ҳам муҳокама қилиниши кутилмоқда. Германия ҳукумати вакиллари бу мавзулар олдиндан кун тартибига киритилганини билдирган.

Мерц АҚШнинг бир томонлама сиёсий қарорлари фонида Хитойга ташриф буюраётган Ғарб етакчилари қаторига қўшилди. 2025 йил ноябрь ойида Испания қироли Филип VI, декабрь ойида Франция Президенти Эммануэль Макрон Пекинга ташриф буюрган. 2026 йилда эса Ирландия, Канада, Финляндия ва Буюк Британия раҳбарларининг ҳам Хитойга бориши режалаштирилган.

Эслатиб ўтамиз, аввалроқ Германия канцлери Фридрих Мерц илк бор Ҳиндистонга расмий ташриф билан борган эди. У Аҳмадобод шаҳридаги Сабармати дарёси бўйида Ҳиндистон Бош вазири Нарендра Моди билан Халқаро варрак фестивалида иштирок этганди.