Эйфель минорасининг бир қисми кимошди савдосига қўйилади

Франция пойтахти Париждаги Эйфель минораси асл зинапоясининг бир қисми аукционга чиқарилади. Бу ҳақда “The New York Times” хабар берди.

Аниқлик киритилишича, ушбу фрагмент меҳмонларга миноранинг иккинчи қаватидан учинчи қаватига кўтарилиш имконини берган айланма зинапоянинг бир қисми бўлган. Газетанинг қайд этишича, 1983 йилда ушбу конструкция демонтаж қилиниб, 24 қисмга бўлинган, уларнинг 20 таси кимошди савдосида сотиб юборилган.

Ушбу қисм аукцион уйи томонидан сотувга қўйилган фрагментларнинг энг сўнггиси бўлади. 2016 йилда зинапоянинг қисмларидан бири рекорд даражадаги 611 минг долларга сотилган.

“Artcurial” савдо уйи бўлажак аукционда бу рекорд янгиланишига умид қилмоқда. Лотнинг бошланғич баҳоси 146–176 минг доллар атрофида баҳоланмоқда. Ҳозирги вақтда ушбу фрагмент уни 1983 йилда сотиб олган франциялик тадбиркорга тегишли.

Маълумот учун, Эйфель минораси муҳандис Гюстав Эйфель томонидан лойиҳалаштирилган ва 1889 йилда Бутунжаҳон кўргазмаси учун қурилган.

Эслатиб ўтамиз, аввалроқ Уйғониш даври рассоми ва ҳайкалтароши Микеланжело Буонарротининг картинаси “Christie’s” кимошди савдосида 27,2 миллион долларга сотилганди.