Эрдўған Путин ва Зеленскийни учраштириш ғоясини НАТОга етказди

north_east

“Келасизми ё борайми?” Эрдўған Путиндан жавоб кутаётганини айтди

Туркия Президенти Ражаб Тойиб Эрдўған Украина ва Россия ўртасида етакчилар даражасида ёки техник даражадаги учрашув ўтказишга тайёр. Бу ҳақда Туркия Президенти идораси маълум қилган. 

Кеча, 18 февраль куни Эрдўған НАТО бош котиби Йенс Столтенберг билан республиканинг альянсга қўшилганининг 70 йиллиги муносабати билан телефон орқали суҳбатлашган.

“Президент Эрдўған Туркиянинг иттифоқда биринчи кундан бошлаб принципиал, масъулиятли ва йўналтирилган позицияга содиқлигини ва буни давом эттиришини таъкидлади.У Россия ва Украина ўртасида давом этаётган инқироз НАТОга аъзо бўлишнинг қўшимча қийматини яна бир бор кўрсатганини таъкидлади. Президент кучланиш бошланганидан бери буни дипломатия йўли билан ҳал қилиш кераклигини айтиб, шунингдек, икки томон билан етакчилар даражасида ёки техник даражада учрашув ўтказишга тайёрлигини маълум қилди”, дейилади хабарда. 

Эрдўған, шунингдек, “Туркия зарур ҳисса қўшишдан ва НАТО хавфсизлиги учун масъулиятни ўз зиммасига олишдан бош тортмайди”, деб қўшимча қилган. 

“Президент янги Стратегик концепцияда терроризм таҳдидини унинг барча кўринишларида қайтаришга устувор аҳамият берилганини таъкидлади. Туркия, айниқса терроризмга қарши кураш каби соҳаларда иттифоқдошларидан керакли ёрдам ва бирдамликни кутишнинг табиий ҳуқуқига эга”, дейилган хабарда. 

Маълумот ўрнида, жорий йилнинг 26 январь куни Эрдўған Россия раҳбарини мамлакатга ташриф буюришга таклиф қилганини маълум қилди. Бундан ташқари, у Россия Президенти Владимир Путин ва Украина Президенти Владимир Зеленский ўртасида учрашув ташкил этиш истагини билдирди. 16 февраль куни Эрдўған Туркияда уч томонлама саммит ўтказиш ғоясига муносабатини билиш учун Путин билан телефон орқали мулоқот қилиш истаги борлигини маълум қилди. 

Россия Президенти Матбуот котиби Дмитрий Песков Москва ва Анқара ўртасида Россия Федерацияси Президентининг ташрифи бўйича келишув борлиги, бироқ аниқ саналар ҳали тасдиқланмагани ҳақида маълум қилган. Шу билан бирга, Матбуот котиби Путин ва Зеленскийнинг Туркияда учрашиш имконияти ҳали амалий жиҳатдан муҳокама қилинмаганини таъкидлаган.