Эрдўған Пезешкиёнга насиҳат қилди

Кеча, 9 апрель куни Туркия Президенти Ражаб Тойиб Эрдўған Эрон Президенти Масъуд Пезешкиён билан телефон орқали суҳбатда Покистонда бошланиши кутилаётган музокаралардан доимий тинчлик ва барқарорликни таъминлаш йўлида максимал даражада фойдаланиш зарурлигини таъкидлади. Бу ҳақда “Anadolu” хабар берди.

Қайд этилишича, етакчилар суҳбат давомида ўт очишни тўхтатиш ва минтақадаги хавфсизлик вазиятини ҳам муҳокама қилган. Эрдўған бу жараёнда Туркия тегишли давлатлар билан биргаликда катта саъй-ҳаракатлар олиб борганини таъкидлаган.

Шунингдек, у жараённи издан чиқаришга уринаётган кучларга имкон бермаслик муҳимлигини айтиб, Туркия янги босқичда ҳам дўст давлатлар билан бирга ҳар томонлама ҳисса қўшишга тайёр эканини айтган.

Қолаверса, Эрдўған биродар Эрон халқининг йўқотишлари муносабати билан ҳамдардлик билдирган.

Эрон Президенти Масъуд Пезешкиён эса Туркиянинг АҚШ ва Исроилнинг Эронга қарши ҳужумларини қоралаган позициясини, айниқса, турк халқининг Эрон билан бирдамлигини юқори баҳолашларини маълум қилган. 

“Туркиянинг Эронга қарши шафқатсиз ҳужумларни қоралаган позицияси ва айниқса, турк халқининг Эрон билан бирдамлигини юқори қадрлаймиз”, деган Пезешкиён.

У Эрон минтақавий барқарорликни сақлаш ва можароларнинг кенгайиб кетишининг олдини олиш мақсадида ўт очишни тўхтатишга рози бўлганини билдириб, ушбу келишувнинг давом этиши қарши томоннинг мажбуриятларга амалда риоя қилишига боғлиқлигини таъкидлаган.

Шунингдек, Пезешкиён халқаро ҳамжамият ва ислом мамлакатлари, айниқса Ливан каби давлатларга нисбатан тажовуз ва жиноятларни тўхтатиш учун АҚШ ҳамда Исроилга босим ўтказиши зарурлигини қайд этган. 

Эслатиб ўтамиз, аввалроқ Ражаб Тойиб Эрдўған Эрондан Туркияга ракета отилиши ортидан Масъуд Пезешкиён билан телефон орқали суҳбатлашиб, уни Туркия ҳаво ҳудудини бузмасликка чақирганди.

Қайд этиш жоиз, жорий йилнинг 7 апрель куни АҚШ Президенти Дональд Трамп Эрон билан 2 ҳафталик сулҳ тузилганини эълон қилди. Бугун, 10 апрель куни Покистонда томонлар ўртасида музокара бошланиши белгиланган. Эрон делегацияси аллақачон Исломободга етиб боргани айтилмоқда.