Тошкентга келганларга автомобилини постда қолдириб, шаҳарга жамоат транспортида киришига шароит қилинади

Энди Тошкент шаҳрига келаётган меҳмонлар автомобилини шаҳар ташқарисидаги тураргоҳларда қолдириб, шаҳарга жамоат транспортида кириши мумкин бўлади. Бу ҳақда бугун, 16 декабрь куни Президент Шавкат Мирзиёев ўтказган Тошкент шаҳрида амалга оширилган ишларни сарҳисоб қилиш ва келгуси йилга янги марраларни белгилаб олишга бағишланган йиғилишда маълум қилинди. 

Декабрнинг бошида Тошкент шаҳрида транспорт бошқарувини такомиллаштириш ва тирбандликни камайтириш бўйича алоҳида қарор имзоланган. Энди йирик мегаполислар каби пойтахтда ҳам транспорт тизимини ягона ёндашув асосида бошқарадиган марказ фаолияти йўлга қўйилади. Бу марказ ҳар бир кўча, ҳар бир чорраҳада транспорт ва пиёдалар оқимини сунъий интеллект ёрдамида таҳлил қилиб, тирбандлик ва йўл-транспорт ҳодисасининг олдини олиш билан шуғулланади.

Келаси йили пойтахтга киришдаги 2 та назорат пости шаҳар ташқарисига кўчади, 3 таси реконструкция қилинади. Бу ерларда камида 3,5 мингта юк ва 5,5 мингта енгил автомобиль учун тураргоҳлар ҳамда аҳоли учун кемпинглар барпо этилади.

Бу нуқталарга жамоат транспорти тармоғи боғланади. Пойтахтга келаётган меҳмонлар автомобилини шу ерда қолдириб, тез ва хавфсиз жамоат транспортида ҳаракатланиши мумкин бўлади.

Шаҳар ҳокимлигига келгуси йилда ягона бошқарув тизимига эга светофорлар билан жиҳозланган 100 та “ақлли” чорраҳани йўлга қўйиш, тадбиркорлар билан 30 мингта автомобиль тўхташ жойи қуриб, 300 та бекатни реконструкция қилиш, 40 километр пиёда ва 20 километр велойўлаклар қуриш, 100 километр йўлни таъмирлаб, Юнусобод ва Яшнободда йўл ўтказгич ва туннель барпо этиш топширилган. Шунингдек, келгуси йилда 200 та электробус олиб келиш вазифаси қўйилган.

Эслатиб ўтамиз, аввалроқ энди эрталабки ва кечки тиғиз вақтда Тошкент шаҳрига келган юк машиналари шаҳарга кириш нуқталаридаги тўхташ жойларида 3 соат кутиб туриши ҳақида хабар берилган эди. Хусусан, Тошкент шаҳрининг “Эркин”, “Шарқ”, “Бектемир”, “Уч қаҳрамон” ва “Турбанов” йўл-патруль хизмати масканларида пойтахт ва унга туташ ҳудудлардан келадиган машиналар учун 5 та автотураргоҳ қурилиши режалаштирилган.