Энди аҳолига суюлтирилган газни хусусий сектор етказиб беради

Тадбиркорларга ўзи импорт қилган ёки биржадан харид қилган суюлтирилган газни аҳоли ҳамда бизнес субъектларига етказиб беришга рухсат берилади. Мазкур тизим дастлаб Андижон вилоятида синов тариқасида жорий этилади. Бу ҳақда бугун, 27 июль куни Ўзбекистон етакчиси раислигида ёқилғи-энергетика тармоғининг устувор вазифаларига бағишланган видеоселектор йиғилишида маълум қилинди.

Қайд этилишича, Андижон вилоятида жорий йилнинг олти ойида режалаштирилган 48 минг тонна ўрнига 41 минг тонна суюлтирилган газ етказиб берилган. Оқибатда вилоятдаги 318 та маҳаллада газ таъминоти белгиланган графикдан ортда қолмоқда.

Йил бошидан буён хусусий сектор томонидан 157 минг тонна суюлтирилган газ импорт қилинган.

Шунингдек, Ижтимоий реестрга киритилган оилаларга суюлтирилган газ хариди учун субсидия ажратилиши белгиланган. Йил якунига қадар ушбу йўналишда “Андижон тажрибаси”ни жорий этиш режалаштирилган.

Президент суюлтирилган газ ишлаб чиқариш ҳажмини йил якунига қадар режалаштирилган 520 минг тонна ўрнига 606 минг тоннага етказиш вазифасини қўйган.

Бундан ташқари, суюлтирилган газни ташиш, сақлаш ва тарқатиш тизимини хорижий тажриба ҳамда халқаро стандартлар асосида бир ой муддатда қайта кўриб чиқиш топширилган. Аҳолининг эҳтиёжидан келиб чиқиб, турли сиғимдаги газ баллонларини жорий этиш масаласи ҳам кўриб чиқилади.

Эслатиб ўтамиз, аввалроқ Ўзбекистонда табиий газ етказиб бериш қийин бўлган 1 минг 916 та маҳаллани электр иситиш тизимига ўтказиш режалаштирилаётгани ҳақида хабар берилган эди.