ДХХ Андижон ва Бухорода хорижий валюта билан боғлиқ жиноятларга чек қўйди

Жамият

image

ДХХ Андижонда 180 минг АҚШ долларини чегара тўсиғи устидан улоқтириш орқали қўшни Қирғизистон Республикасига ўтказмоқчи бўлган фуқарони ва Бухорода қалбаки валюталар савдоси билан шуғулланаётган чайқовчиларни қўлга олди. 

ДХХ Андижон вилояти бошқармаси ходимлари ва Чегара қўшинлари ҳарбий хизматчилари томонидан Хўжаобод тумани Янги Фарғона МФЙдаги чегараолди ҳудудда ўтказилган тезкор тадбир давомида катта миқдордаги хорижий валютанинг ноқонуний равишда мамлакатдан олиб чиқиб кетилишига чек қўйилган.

Маҳаллий фуқаро Х.Н. 180 минг АҚШ долларини чегара тўсиғи устидан улоқтириш орқали қўшни Қирғизистон Республикасига ўтказмоқчи бўлган. Дастлабки суриштирув ҳаракатлари давомида аниқланишича, Х.Н. 200 минг сўм эвазига ушбу чет эл валютасини давлат чегарасидан ўтказиб бериши керак бўлган.

Ҳозирда Х.Н.га нисбатан жиноят иши қўзғатилиб, хорижий валютанинг ҳақиқий эгасини аниқлаш бўйича чора-тадбирлар кўрилмоқда.

Шунингдек, ДХХ Бухоро вилояти бошқармаси ходимларининг Бош прокуратура ҳузуридаги Департаментнинг ҳудудий бошқармаси билан ҳамкорликда ўтказган тезкор тадбири натижасида, Бухоро шаҳрида катта миқдордаги қалбаки хориж валютасининг муомалага киритилишига чек қўйилган.

Хусусан, мамлакатга яширинча олиб келинган сохта чет эл валютасини Тошкент шаҳрида яшовчи Т.Х. ва Т.М. сотиш мақсадида Бухоро шаҳрига олиб боришади. Улар калбаки 88 450 АҚШ долларини 34 000 АҚШ долларига сотган вақтларида ашёвий далиллар билан ушланди. Шунингдек, уларнинг ёнида яна 10 минг 50 сохта АҚШ доллари борлиги маълум бўлди. Тезкор тадбир давомида жами 98 500 қалбаки АҚШ доллари мусодара қилинди.

Ҳозирда мазкур ҳолат юзасидан жиноят иши қўзғатилиб, тергов ҳаракатлари олиб борилмоқда.


Мақола муаллифи

Теглар

ДХХ валюта

Баҳолаганлар

95

Рейтинг

3.1

Мақолага баҳо беринг

Дўстларингиз билан улашинг