Далолатномани расмийлаштирмасликни ваъда қилган сув таъминоти ходими ушланди

Фарғона вилоятида “Фарғона сув таъминоти“ АЖ ходими 2 млн сўм эвазига ноқонуний фойдаланилган 8,4 млн сўмлик ичимлик суви бўйича далолатномани йўқ қилиб беришни ваъда қилиб, пулни фирибгарлик йўли билан қўлга киритгани аниқланди. Бу ҳақда Бош прокуратура ҳузуридаги Иқтисодий жиноятларга қарши курашиш департаменти хабар берди.

Маълум қилинишича, “Фарғона сув таъминоти“ АЖ Фурқат тумани бўлими ходими Х.Т. (муқаддам судланган) фуқаро Ж.М.нинг “А.П.“ МЧЖ ҳудудидаги цехида 8,4 млн сўмлик ичимлик сувидан ноқонуний фойдаланилганлик ҳолати бўйича далолатнома расмийлаштирилганини айтган. У 2 млн сўм берса, ушбу далолатномани йўқ қилиб беришини ваъда қилиб, пулни фирибгарлик йўли билан қўлга киритгани маълум бўлган.

Шунингдек, Х.Т. томонидан 2 млн сўмнинг қайтарилиши процессуал тартибда расмийлаштирилган.

Мазкур ҳолат юзасидан Жиноят кодексининг 168-моддаси (фирибгарлик) билан жиноят иши қўзғатилиб, тергов ҳаракатлари ўтказилмоқда.

Эслатиб ўтамиз, аввалроқ Қорақалпоғистон Республикасида мактабгача таълим муассасасининг директори ва унинг ўринбосари пора билан қўлга тушганди.