Дэвид Бекхэм FIFA президенти бўлиши мумкин

Англия терма жамоасининг собиқ футболчиси ва АҚШнинг “Интер Майами” клуби муассиси Дэвид Бекхэм Халқаро футбол федерацияси (FIFA) президентлигига номзод бўлиши мумкин. Бу ҳақда ўз манбаларига таяниб, “Sky Sports” хабар берди.

Маълумотларга кўра, Бекхэм номзодини Европа футбол  иттифоқи (UEFA) қўллаб-қувватламоқда. Манба уни тажрибали менежер, жаҳон миқёсидаги юлдуз ва оммавий маданият рамзи сифатида кўришларини таъкидлаган.

51 ёшли Бекхэм 2020 йилдан буён АҚШнинг Олий лигасида иштирок этиб келаётган “Интер Майами” клуби эгаларидан бири ҳисобланади. Жамоа ўтган йили мусобақада ғолиб чиққан.

Футболчилик фаолияти давомида Бекхэм “Манчестер Юнайтед”, “Реал Мадрид”, “Милан”, “Пари Сен-Жермен” ва “Лос-Анжелес Гэлакси” клубларида тўп сурган. У “Манчестер Юнайтед” билан Англия Премьер-лигасида олти марта, Англия кубогида икки марта ва Чемпионлар лигасида бир марта ғолиб бўлган. Шунингдек, Испания ва Франция чемпионатларида ҳам бир мартадан чемпионликни қўлга киритган.

Маълумот учун, FIFA президенти сайлови 2027 йил март ойида Марокашда бўлиб ўтиши режалаштирилган. Номзодлар ўз аризаларини жорий йилнинг 18 ноябрга қадар топширишлари мумкин.

FIFA’нинг амалдаги президенти Жанни Инфантино 2016 йил февраль ойидаги навбатдан ташқари конгрессда сайланган. Кейинчалик у икки марта рақибсиз қайта сайланган. Инфантино яна бир муддатга сайланиш учун курашишини ҳам маълум қилган.