Чемпионликдан маҳрум қилинган Сенегал CAS'га шикоят йўллади

Сенегал футбол федерацияси миллий терма жамоани Африка кубоги чемпионлигидан маҳрум қилиш ҳақидаги қарор устидан Халқаро спорт арбитраж судига (CAS) шикоят киритишини маълум қилди. Бу ҳақда федерациянинг расмий сайти хабар берди.

“Кеча, 17 март куни CAF апелляция қўмитаси томонидан чиқарилган қарор билан танишдик. Ушбу қарор адолатсиз, мисли кўрилмаган ва қабул қилиб бўлмайдиган ҳолат бўлиб, Африка футболи обрўсига путур етказади. Сенегал футбол федерацияси ўз ҳуқуқлари ва миллий футбол манфаатларини ҳимоя қилиш мақсадида Лозаннадаги Спорт арбитраж судига зудлик билан мурожаат қилади”, дейилади федерация баёнотида.

Эслатиб ўтамиз, аввалроқ Африка футбол конфедерацияси (CAF) Апелляция қўмитаси Сенегални Марокашга қарши финал учрашувида мағлуб деб топиб, чемпионликни Сенегалдан Марокашга берган эди. 

Жорий йилнинг 18 январь куни Африка кубоги финал баҳсида эса Сенегал мезбонларни қўшимча вақтда 1:0 ҳисобида енгганди.

Учрашувнинг асосий вақтига қўшиб берилган дақиқаларда бош ҳакам Сенегал дарвозаси томон пенальти белгилаган. Ҳакам қароридан норози бўлган сенегаллик футболчилар майдонни тарк этган. Маълум қилинишича, бу ҳолат мусобақа регламентининг 82-моддасига зид ҳисобланади. Унда жамоа ўйин якунланмасдан ҳакам рухсатисиз майдонни тарк этса, мусобақадан четлаштирилиши мумкинлиги белгиланган. Шу сабабли Сенегалнинг чемпионлиги Марокашга берилди.