“Бу менинг масъулиятим”. Зеленский истеъфога чиқиш нияти йўқлигини айтди

Украина Президенти Владимир Зеленский истеъфога чиқиш нияти йўқлигини билдирди, шунингдек, ҳозирги вақтда сайловлар ўтказиш имконияти ҳақида гапириб ўтди. Бу ҳақда у журналист Пирс Морганнинг “Uncensored” шоусида сўз очди.

Украина етакчиси шоуда истеъфога чиқишни режалаштирмаётганини тасдиқлаган. У бу унинг масъулияти эканини таъкидлаган.

“Албатта, йўқ. Бу менинг масъулиятим”, деб жавоб берган Зеленский журналистнинг саволига.

Шунингдек, сиёсатчи, жумладан, АҚШ Президенти Дональд Трамп томонидан қилинган чақириқларга қарамай, сайловларни ўтказишнинг имкони йўқлигини маълум қилган.

“Ҳар соатда бизда ҳужумлар бўлмоқда... Шундай экан, хавфсизлик нуқтаи назаридан сиз сайлов ўтказа олмайсиз”, дейди Зеленский.

Украина Президенти, шунингдек, аскарлар фронтда эканини ва биринчи бўлиб овоз бериш ҳуқуқига эга бўлишлари кераклигини таъкидлаган.

“Биз аскарларсиз президент танлай олмаймиз, чунки улар ўз жонларини фидо қилмоқда ва фидо қилишган. Улар биринчи бўлиб овоз беришлари керак ва ўйлайманки, бу адолатдан бўлади”, дея қўшимча қилган у.

Эслатиб ўтамиз, аввалроқ Оқ уй раҳбари Дональд Трамп Владимир Зеленскийни кескин танқид қилиб, Украина битимлар тузишга қодир бўлган янги етакчи топиши кераклигини айтган эди.

Кейинчалик ОАВ Украинанинг янги президенти лавозимига тўртта номзод номини келтирди.

Зеленскийнинг ўзи эса, агар Россия 60 кунлик тўлиқ ўт очишни тўхтатишга рози бўлса, президентлик сайловларини ўтказишга тайёрлигини билдирган. Бунга жавобан Кремль Зеленскийнинг Украинада сайловлар ўтказиш учун икки ойлик сулҳ тузиш ҳақидаги таклифини рад этган.