Британия Россияга янги санкциялар жорий қилди

Буюк Британия Россиянинг етти нафар фуқароси ва иккита илмий-тадқиқот институтига нисбатан янги санкциялар жорий қилди. Бу ҳақда “Associated Press” хабар берди.

Маълум қилинишича, Лондон уларни россиялик мухолифатчи Алексей Навальний ва собиқ разведкачи Сергей Скрипалга қарши қўлланган кимёвий моддаларни ишлаб чиқишда иштирок этганликда айбламоқда.

Буюк Британия Ташқи ишлар вазирлиги маълумотига кўра, санкциялар 2024 йилда Алексей Навальний заҳарланганида қўлланган эпибатидин токсини ҳамда 2018 йилда Англиянинг Солсбери шаҳрида Сергей Скрипал ва унинг қизига қарши ишлатилган Новичок асабни фалажловчи моддаси яратилишига алоқадор шахс ва ташкилотларга нисбатан қўлланган.

Санкциялар рўйхатига Россиянинг SC Signal давлат илмий-тадқиқот институти, Ҳарбий тиббиёт бўйича давлат илмий-тадқиқот ва синов институти, шунингдек, бир қатор юқори лавозимли амалдорлар ва олимлар киритилган.

Буюк Британия Ташқи ишлар вазири Иветт Купер Россиянинг кимёвий қуроллардан такроран фойдаланганини халқаро ҳуқуқнинг қўпол бузилиши ва глобал хавфсизликка таҳдид деб баҳолаган.

Шунингдек, Британия Мудофаа вазирлиги Россиянинг Bear-F патрул самолёти Норвегия денгизи устидан учиб ўтганини маълум қилган. Вазирлик маълумотига кўра, самолёт сувости кемаларини аниқлаш учун мўлжалланган сонобуйларни ташлаган. Шундан сўнг у Британиянинг иккита F-35 қирувчиси томонидан ҳудудни тарк этгунига қадар кузатиб борилган.

Эслатиб ўтамиз, аввалроқ Европа Иттифоқи Кенгаши ҳам Кремль танқидчиси Алексей Навальнийнинг ўлимига сабаб бўлган заҳарли моддани ишлаб чиқишда иштирок этган олти нафар шахсга нисбатан санкциялар жорий қилганди.