БМТ конференциясида 10 давлат Фаластинни тан олади

Ўн давлат вакиллари 22 сентябрь куни Бирлашган Миллатлар Ташкилотида ўтказиладиган конференция давомида Фаластинни давлат сифатида расман тан олишларини эълон қилмоқчи. Бу ҳақда Елисей саройида, Франция Президенти Эммануэль Макроннинг БМТ Бош Ассамблеясида иштирок этишидан аввал бўлиб ўтган брифингда маълум қилинди.

Қайд этилишича, Фаластинни расман тан олмоқчи бўлганлар орасида Франция, Андорра, Австралия, Бельгия, Буюк Британия, Канада, Люксембург, Мальта, Португалия ва Сан-Марино бор.

Франция етакчиси офисининг баёнотида Исроилнинг Ғарбий Соҳилда Фаластин ҳудудларини босиб олишга уринишлари қораланган ва бу ҳолат “қизил чизиқларни босиб ўтиш” деб баҳоланган.

Президент Эммануэль Макрон аввалроқ ҳам 22 сентябрь куни БМТ доирасида Фаластин давлатини тан олиш бўйича конференция ўтказилишини маълум қилган эди. У бу ташаббус Исроил ҳукуматининг қарорларидан ёки Ғазо секторидаги жанговар ҳаракатлардан қатъи назар амалга оширилишини билдирган.

Бугунги кунга келиб, Фаластин давлатини БМТга аъзо 148 та давлат расман тан олган. 95 та мамлакатда Фаластиннинг элчихоналари ва доимий ваколатхоналари фаолият юритмоқда. 1988 йилда собиқ Совет Иттифоқи Фаластин давлатини тан олган бўлиб, унинг ҳуқуқий вориси сифатида Россия бу қарорни сақлаб қолган.

Эслатиб ўтамиз, жорий йилнинг август ойида Австралия Бош вазири Энтони Альбанезе Фаластинни тан олишни сентябрь ойида Бош ассамблея йиғилишида эълон қилишини билдирганди.

Шунингдек, Франция Президенти Эммануэль Макрон ҳам июлда БМТ Бош ассамблеясида Фаластинни тан олишга тайёрлигини билдирган эди.

Бундан ташқари, Бельгия, Португалия, Канада ва Мальта каби Ғарб давлатлари ҳам Фаластинни тан олиш ниятида эканини маълум қилган. Уларнинг аксарияти буни яқинда бўладиган БМТ Бош ассамблеясида амалга оширмоқчи.