Президентлигига номзодини қўйган дзюдочининг солиқдан қарзи борлиги маълум бўлди

Франция солиқ хизмати мамлакат президентлигига номзодини қўйишини эълон қилган дзюдо бўйича беш карра Олимпия чемпиони Тедди Ринердан 244 минг евродан ортиқ маблағни ундиришга бир неча ойдан бери уринмоқда. Бу ҳақда “L’Équipe” нашри хабар берди.

Дунёнинг энг кўп совринга эга дзюдочиси Ринер жорий йилнинг 9 ноябрь куни президентлик сайловларида иштирок этиш ниятини маълум қилган.

Газета маълумотига кўра, О-де-Сен департаментининг қарзларни ундириш бўйича махсус бўлими жорий йилнинг июль ойида дзюдочининг Кот-д’Азурда вилла қуриш билан шуғулланган компанияларидан бири – “Riner Estate”ни мажбурий тугатиш жараёнини бошлаган. Сентябрь ойида суд компанияни тугатиш ҳақида қарор чиқарган. Ринер ушбу компанияни 2014 йилда ҳамкори билан ташкил этган, аммо ҳамкори 2018 йилда лойиҳадан чиқиб, ўз улушини дзюдочига топширган.

“L’Équipe” таъкидлашича, Ринер аввал ҳам солиқ қонунчилиги бузилиши билан боғлиқ бошқа ҳолатларда, жумладан, кўчмас мулки қийматини кам кўрсатиш, шунингдек, қимматбаҳо автомобиллар, ресторанлар ва саёҳатлар каби шахсий харажатларни компаниялари ҳисобидан қоплашда айбланган.

“RMC Sport” нашри ёзишича, Ринернинг президентликка номзодини қўйиш нияти кўпчилик учун кутилмаган бўлса-да, у бу қадамга бир неча ой давомида тайёргарлик кўрган. Унинг сайловолди кампаниясида асосий шахслардан бири тиш имплантлари ва протезлари ишлаб чиқарувчи “Biotech Dental” компанияси президенти Филипп Веран ҳисобланади. Собиқ соғлиқни сақлаш вазири Франсуа Брон ҳам Ринерни қўллаб-қувватлаётганлар қаторида.

Маълумот учун, Ринер 100 килограммдан юқори вазн тоифасида 2012, 2016 ва 2024 йилги Олимпия ўйинлари чемпиони бўлган. Шунингдек, у Токио ва Парижда жамоавий баҳсларда ҳам Олимпия олтин медалини қўлга киритган. Дзюдочи 12 карра жаҳон чемпиони ҳисобланади. Эътиборли жиҳати шундаки, Тедди Ринер 2008 йилда Пекинда бўлиб ўтган Олимпия ўйинларида бронза медалини қўлга киритган. Ўшанда 19 ёшли Ринер 100 кг дан ортиқ вазн тоифасида ярим финалгача етиб бориб, ўзбекистонлик дзюдочи Абдулла Тангриевга ютқазиб қўйган. Тангриев олтин медаль учун кечган кескин беллашувда Япония вакили Сатоши Ишиига мағлуб бўлиб, фаолиятидаги энг юқори Олимпия мукофоти – кумуш медалга эга чиққан.

Эслатиб ўтамиз, аввалроқ Франция Президенти Эммануэль Макрон Тедди Ринернинг 2027 йилги президентлик сайловларида номзодини қўйиш қарорини олқишлаганди.