“Biz ortga qaytishni istamaymiz”. Bosqinchi migrantlar namoyishga chiqdi

Ispaniyaning Shimoliy Afrikadagi Seuta anklaviga bostirib kirgan yuzlab migrantlar shahardagi plyajlardan birida norozilik namoyishi o‘tkazdi. Ular Ispaniya hukumatidan Marokashga qaytarilmasdan, Ispaniyada qolish va boshpana berilishini so‘ragan. Bu haqda “Reuters” xabar berdi.

Namoyishda qatnashganlar ikki hafta avval Seutaga ommaviy ravishda bostirib kirgan migrantlar orasida bo‘lgan. Hozir anklavda 5 mingdan 8 minggacha migrant qolgan. Dastlab esa 72 mingdan ortiq odam aholisi qariyb 80 ming bo‘lgan kichik hududga kirib kelgan, ularning aksariyati keyinchalik ixtiyoriy ravishda Marokashga qaytgan. Migrantlarning bir qismi Seutadagi El Trampolin plyaji yoki shahar chekkalarida qiyin sharoitlarda yashab, Ispaniyaga o‘tishni kutmoqda.

Namoyish vaqtida migrantlar Ispaniya bayroqlari hamda “Biz Marokashga qaytishni istamaymiz” va “Biz ham insonmiz” mazmunidagi bannerlarni ko‘targan. Ular “Biz charchadik” va “Bizga yechim kerak” kabi shiorlarni ham aytgan.

Marokashning Tetuan shahridan bo‘lgan migrantlardan biri Ayub Elarroud hozirgi sharoitdan shikoyat qilgan. Uning aytishicha, migrantlar dengiz bo‘yida sovuq va noqulay sharoitda tunashga majbur bo‘lmoqda. Shuningdek, uning ta’kidlashicha, politsiya migrantlarning shahar markaziga borishiga to‘sqinlik qilmoqda.

Ispaniya Ichki ishlar vaziri Fernando Grande-Marlaska avvalroq noqonuniy ravishda anklavga kirgan migrantlarga Seutada qolish, mamlakatning materik qismiga o‘tish yoki qonuniy maqom olishga ruxsat berilmasligini bildirgan. Bunda faqat alohida, og‘ir ijtimoiy holatlar istisno qilinishi mumkin.

Seuta tibbiyot kengashi rahbari Enrike Roviraltaning aytishicha, shahardagi tibbiyot xodimlari migrantlar oqimi sabab katta bosim ostida qolgan. U ayrim yuqumli kasalliklar, jumladan, diareya va qo‘tir holatlari ko‘payganini, shuningdek, turli jarohatlar bilan murojaatlar soni ortganini bildirgan.

Biroq Ispaniya sog‘liqni saqlash vaziri Monica Garsiya mahalliy tibbiy xizmatlar butunlay izdan chiqqani haqidagi fikrlarni rad etgan. Uning qayd etishicha, tizimga bosim mavjud, biroq u faoliyatini davom ettirmoqda.

“Reuters” suhbatlashgan ayrim marokashlik migrantlar esa o‘z mamlakatlaridagi ish sharoitlari va iqtisodiy imkoniyatlarning cheklangani ularni Yevropaga yo‘l olishga undaganini aytgan.

Shu bilan birga, Seutada boshpana izlayotganlar orasida Nigeriya, Senegal va Bangladesh kabi davlatlardan bo‘lgan migrantlar ham bor. Ularning ayrimlari o‘z mamlakatlaridagi mojaro, ta’qib yoki xavfsizlik bilan bog‘liq muammolar sabab Yevropaga kelganini bildirgan.

Hozircha Seutadagi migrantlarning keyingi taqdiri va ularning boshpana olish bo‘yicha talablari yuzasidan yakuniy qaror e’lon qilinmagan.

Eslatib o‘tamiz, avvalroq Marokashdan Ispaniyaning Shimoliy Afrikadagi Seuta anklaviga ommaviy ravishda o‘tishga urinish oqibatida halok bo‘lganlar soni kamida 72 nafarga yetgani haqida xabar berilgan edi.