Биринчи босқич талабалари учун дарс машғулотлари бошланиш куни ўзгарди 

Ўзбекистонда 2021/2022-ўқув йилига талабаликка тавсия этилганлар (1-босқич талабалари) учун жорий йилнинг 6 сентябридан дастлабки таништирув ҳафталиги (хусусан, мустақиллик дарслари), 13 сентябридан эса ўқув режага мувофиқ дарс машғулотлари бошланади. Бу ҳақда Олий ва ўрта махсус таълим вазирлиги ахборот хизмати хабар берди. 

Янги ўқув йилидан бошлаб барча олий таълим муассасаларининг биринчи курс талабалари учун ўқув жараёни кредит-модул тизими орқали ташкил этилади. 

Таништирув ҳафталигида талабалар кредит-модул тизимининг мазмун-моҳияти, ўқув жараёнига татбиқ этилиш тартиби, олий таълим муассасасининг ички тартиб-қоидалари ва шу каби зарурий ахборотлар билан таништирилади. 

Шу билан бирга, таништирув ҳафталигини ташкил этишда доимий яшаш манзилидан, хусусан, Республиканинг бошқа ҳудудларида бўлган талабаларнинг олий таълим муассасасига етиб келиши, турар-жойларига жойлашиши учун вақт ажратилиши инобатга олинади. Юқори курс (биринчи курсдан ташқари) талабалари учун эса дарс машғулотлари умумий тартибда 6 сентябрдан бошланади. 

Аввалроқ, Ўзбекистонда маҳаллий олийгоҳлараро ўқишни кўчириш имтиҳони жавоблари жорий йилнинг 6 сентябрь куни соат 16:00 дан бошлаб ОТМ расмий сайтида эълон қилиниши ҳақида хабар бергандик.