“Бавария” мураббийи билан шартномани узайтирди

Мюнхеннинг “Бавария” клуби бош мураббийи Венсан Компани билан амалдаги шартномасини 2029 йилгача узайтирганини маълум қилди. Бельгиялик мутахассиснинг амалдаги битими аввал 2027 йил ёзига қадар мўлжалланган эди. Бу ҳақда клуб матбуот хизмати хабар берди.

Компани “Бёрнли”ни тарк этиб, “Бавария”га келганидан сўнг қисқа вақт ичида жамоа билан иккита совринни –  Бундеслига чемпионлиги ва Германия Суперкубогини қўлга киритди. Дастлаб унинг тажрибаси борасида шубҳалар бўлган бўлса-да, у ўзини Европанинг энг юқори даражадаги клубларидан бирини бошқаришга қодир мураббий сифатида кўрсатди.

“Мен миннатдорман ва фахрланаман. Биринчи кундан бошлаб менга билдирилган ишонч учун клуб раҳбариятига раҳмат айтаман. Бу ерда ўзимни жуда қулай ҳис қиляпман ва “Бавария”нинг бир қисмига айланганимдан хурсандман. Олдимизда яна кўплаб мақсадлар бор, биргаликда уларга эришамиз”, дейди Компани клубнинг расмий сайтига берган интервьюсида.

Маълумот учун, мюнхенликлар ҳозирда Бундеслигада пешқадамликни сақлаб турибди ва Европа майдонида ўз мавқеини тиклашни мақсад қилган. Венсан Компани шогирдлари Чемпионлар лигаси 3-турида Бельгия клуби “Брюгге”га қарши майдонга тушади. Ушбу учрашув 23 октябрь кунига ўтар кечаси бўлиб ўтади.