Аш-Шара амалдорларини шоҳона ҳаётдан воз кечишга чақирди

Сурия муваққат президенти Аҳмад аш-Шара қимматбаҳо автомобилларда келган юздан ортиқ тадбиркор ва давлат хизматчиларини кескин танқид қилди. Бу ҳақда “Breitbart” хабар берди.

У йирик амалдорларга аччиқ саволлар билан юзланиб, қимматбаҳо машиналар билан алданиб қолмасликка, давлат пулини талон-торож қилмасликка чақирган. 

“Давлат шунчалик катта маош тўлаяптими? Инқилоб фарзандлари эканлигингизни унутдингизми? Шунчалик тез бузилдингизми?”, дея койиган Аҳмад аш-Шара.

Нашрнинг икки манбасига кўра, етакчи бу сўзларни йиғилиш жойида қаторлашиб турган қимматбаҳо машиналарни кўрсатиб айтган.

Идлиб шаҳрида 30 август куни ўтган учрашувда  аш-Шара давлат хизматчиларини қимматбаҳо автомобилларини топшириш ҳақида огоҳлантириб, акс ҳолда коррупция тергови бошланишини маълум қилган. Баъзи иштирокчилар йиғилишдан сўнг машина калитларини топширгани айтилмоқда.

14 йиллик фуқаролар урушидан сўнг, ҳокимиятни Башар Асаддан олган аш-Шара ўзининг дастлабки ўн ойида жиддий муаммоларга дуч келди. Янги ҳукумат таркибига кирган собиқ мухолиф гуруҳлар ўртасидаги можаролар оқибатида 2 мингдан ортиқ киши ҳалок бўлган, айрим уйлар талон-торож қилинган.

Мутахассисларнинг фикрича, аш-Шарани кутаётган энг катта синов Асад давридан қолган илдиз отган коррупция тизимини йўқотиш бўлади.

Сурия ахборот вазирлиги ҳам давлат хизматчилари орасида коррупцияга нисбатан мутлақо муросасизлик сиёсати юритилишини таъкидлаган.

Эслатиб ўтамиз, Аҳмад аш-Шара БМТ Бош Ассамблеясининг 80-юбилей сессиясидаги тарихий нутқида ўз мамлакатининг ўтган авлод зулмидан воз кечаётганини эълон қилиб, Сурияга нисбатан қўлланган санкцияларни тўлиқ бекор қилишни талаб қилганди.