АҚШ Венесуэла соҳилларидаги кемаларни қўлга олмоқда

Жорий йилнинг 20 ва 21 декабрь кунлари АҚШ ҳарбийлари Венесуэла қирғоқлари яқинида икки кемани қўлга олди. Бу ҳақда АҚШ Ички хавфсизлик вазири Кристи Ноэм хабар берди.

Бу воқеа АҚШ Президенти Дональд Трампнинг Венесуэлага бораётган ва у ердан чиқаётган барча санкцияга тушган нефть танкерларини тўлиқ блокадага олиш ҳақидаги буйруғидан бир неча кун ўтиб содир бўлди. Кеча, 21 январь куни эса АҚШ кемалари ушбу ҳудудда яна бир – сўнгги кунлардаги учинчи нефть танкерини таъқиб қилаётгани ҳақида маълумотлар пайдо бўлди.

CBS ва “Bloomberg” хабарига кўра, АҚШ қирғоқ қўриқлаш хизмати Панамада рўйхатдан ўтган ва АҚШ санкциялари остидаги Bella1 танкерини таъқиб қилишни бошлаган. Танкер Венесуэлага йўл олган эди. CBS News’га аноним америкалик расмий маълум қилишича, ушбу кема “Венесуэлага санкцияларни ноқонуний четлаб ўтишда ёрдам берадиган яширин флотга тегишли” бўлиб, “сохта байроқ остида ҳаракатланади”.

Сўнгги ҳафталарда АҚШ Венесуэла соҳиллари яқинида ҳарбий иштирокини кучайтирди. Вашингтон бу чоралар наркотиклар савдосига қарши курашга қаратилганини айтмоқда. Бироқ Каракасда АҚШ Венесуэладаги табиий бойликлар, аввало, нефть устидан назорат ўрнатиш учун ҳокимиятни алмаштиришга интилмоқда, деган фикр билдирилмоқда.

Сентябрдан буён АҚШ Кариб денгизида наркотик савдосида гумон қилинган 20 дан ортиқ кемага зарба берган. Оқибатда камида 87 киши ҳалок бўлган.

20 январь куни АҚШ ҳарбийлари Centuries номли кемани ҳам қўлга олган. ОАВнинг ёзишича, ушбу кема АҚШ санкциялари остида бўлмаган, ҳолбуки Трампнинг блокада ҳақидаги фармони фақат санкцияга тушган танкерларни қамраб олган.

CNN маълумотига кўра, кема Панама байроғи остида сузиб, Осиё томон йўл олган. BBC’нинг қўшимча қилишича, сўнгги беш йил ичида Хитойга тегишли бўлган ушбу танкер Греция ва Либерия байроқлари остида ҳам ҳаракатланган.

Эслатиб ўтамиз, Вашингтон Венесуэлага босимни кучайтираётган бир пайтда, Қўшма Штатлар 19 декабрь куни Президент Николас Мадуро, унинг рафиқаси ва оила аъзолари ҳамда шерикларига қарши санкциялар жорий қилганди.