АҚШ ва Россия ўртасида янги музокаралар бўлиб ўтди – Рубио

АҚШ Давлат котиби Марко Рубио жорий ҳафта бошида АҚШ ва Россия вакиллари ўртасида янги музокаралар бўлиб ўтганини маълум қилди. Бу ҳақда у бугун, 31 июль куни “Fox Radio” эфирида айтиб ўтди.

Унга кўра, мулоқот 28 июль ёки 29 июль куни ўтказилган ва унда Россия Президенти Владимир Путиннинг ўзи эмас, балки унинг атрофидаги юқори лавозимли шахслар иштирок этган.

“Биз улар билан батафсил суҳбат ўтказдик, келгусидаги йўл бўйича ўзаро тушунувга эришишга умид қилдик – бу йўл тинчликка олиб бориши мумкин эди. Аммо биз бу борада ҳеч қандай ютуқни кўрмадик. Бу айнан Президент Трампни энг кўп ташвишга солаётган масала”, деган Давлат котиби. 

Рубионинг фикрича, урушни тўхтатиш ва музокараларни бошлаш энг тўғри ечим бўлиб қолмоқда. Бироқ у Россия томонидан бу йўналишда “чин дилдан қизиқиш” кўрсатилмаганини таъкидлаган. Айнан шу сабабли, Трамп Россияга нисбатан чоралар кўришга қарор қилган.

Трамп 29 июль куни Украина можаросини тартибга солиш бўйича янги 10 кунлик муҳлат белгилади. Аввалги, 14 июлда берилган 50 кунлик муҳлат бекор қилинди. Агар 8 августгача ҳеч қандай натижа кузатилмаса, АҚШ Россияга ва унинг савдо ҳамкорларига қарши иккиламчи божлар жорий этишини билдирди.

Кремль эса ўз навбатида Россия можарони тинч йўл билан ҳал қилишга содиқ қолаётганини таъкидламоқда. Унга кўра, Россия Трампнинг Украинада урушни тўхтатиш бўйича берган баёнотларини инобатга олади.