Кремль Трампнинг таҳдидига жавоб берди

Россия АҚШ Президенти Дональд Трампнинг Украинада урушни тўхтатиш бўйича берган баёнотларини инобатга олади. Бу ҳақда бугун, 29 июль куни Россия Президенти матбуот котиби Дмитрий Песков журналистлар билан ўтказилган матбуот анжуманида сўз очди.

“Кеча Президент Трамп томонидан айтилган баёнотни эътиборга олдик. Махсус ҳарбий операция давом этмоқда. Биз эса Украинадаги можарони сиёсий йўл билан ҳал этиш ва Россиянинг манфаатларини таъминлаш йўлида тинчликка содиқлигимизни сақлаб қоламиз”, деган Песков. 

Кремль вакили Трампнинг Владимир Путиндан кўнгли қолгани, у билан гаплашишга энди қизиқмаслиги ҳақидаги сўзларига эса изоҳ беришдан қочган. 

“Мен бу бўйича қандайдир баҳолардан қочмоқчиман, фақат шуни такрорлайман – баёнот эътиборга олинди”, деган Президент матбуот котиби. 

Шунингдек, Песков Путин ва Трамп ўртасида учрашув эҳтимоли ҳақида ҳам тўхталиб ўтган. 

“Бу масала кун тартибида бўлган эмас ва ҳозир ҳам ундай эмас”, деган Песков. 

Маълумот учун, Дональд Трамп 28 июль куни Украинадаги можаронинг дипломатик йўл билан ҳал этилиши учун аввал белгиланган 50 кунлик муддатни 10–12 кунга қисқартирганини эълон қилди.

Шу билан бирга, 14 июль куни у Москва ва унинг савдо ҳамкорларига нисбатан 100 фоизгача божлар жорий этилиши мумкинлигини айтган эди. Трампнинг фикрича, агар белгиланган муддат ичида ўт очишни тўхтатиш тўғрисида битим тузилмаса, кескин чоралар кўрилади. У бу қарорини “Путиннинг ҳаракатларидан ҳафсаласи жуда пир бўлгани” билан изоҳлаган.

Эслатиб ўтамиз, аввалроқ Украина Президенти Владимир Зеленский Трампнинг бу қарорини ижобий баҳолаганди ва уни олқишлаб, бу чора можарога тезроқ нуқта қўйишига ишонишини билдирганди.