АҚШ университетларидан бирида оммавий отишма юз берди (видео)

Кеча, 17 апрель куни Қўшма Штатларнинг Флорида университетида оммавий отишма содир бўлди. Бу ҳақда CNN хабар берди.

Отишмада камида 6 киши жароҳатланган, 5 киши ҳалок бўлган. Беморлардан бирининг аҳволи оғир, 5 нафари эса ўта оғир. Телеканал маълумотларига кўра, отишмани икки киши амалга оширган: улардан бири қўлга олинган, иккинчиси полиция томонидан отиб ўлдирилган. Ҳозирда ҳодиса жойида ҳуқуқ-тартибот идоралари ходимлари иш олиб бормоқда.

Отишма вақтида университет маъмурияти талабаларни хавфсиз бошпана қидиришга чақирган. Университетдаги барча дарслар номаълум муддатга бекор қилинган.

CNN берган қўшимча маълумотларга кўра, қўлга олинган гумонланувчи 20 ёшли Феникс Икнер маҳаллий шериф ўринбосари Жессика Икнернинг ўғли экани аниқланган. У онасининг хизмат қуроли бўлган тўппончани олиб юрган. Суд ҳужжатларини кўриб чиқиш шуни кўрсатадики, Феникс Икнернинг болалиги нотинч ўтган, ҳужжатларда унинг биологик онаси бўлган бошқа аёл уни 10 ёшида васийлик шартномасини бузган ҳолда АҚШдан олиб чиққанликда айбланган.

Яна бир маҳаллий шериф Уолтер Макнейл журналистларга гумонланувчи ҳақида шундай деган:

“У Леон округи шерифи идораси оиласида бўлган ва бизда мавжуд бўлган бир қатор ўқув дастурларида қатнашган, шунинг учун унинг қуролга эга бўлиши биз учун ажабланарли эмас”, деган Макнейл.

Йигитнинг онаси Жессика Икнер шериф бўлимида 18 йилдан кўпроқ вақт давомида хизмат қилган. Феникс Икнер шерифнинг Ёшлар маслаҳат кенгашининг аъзоси бўлган.

Эслатиб ўтамиз, жорий йилнинг 4 февраль куни Швециянинг пойтахт Стокгольмдан 200 км ғарбда жойлашган Эребру шаҳридаги таълим муассасасида содир бўлган отишма оқибатида ўнга яқин одам ҳалок бўлганди.