АҚШ “Газпром”га қарши санкциялар тайёрламоқда – ОАВ

АҚШ Президенти Дональд Трамп маъмурияти Украина урушини тўхтатишга интилиш белгиларини кўрсатмаётган Кремлга нисбатан янги иқтисодий чораларни ишлаб чиқди. Бу ҳақда Оқ уйдаги манбаларга таяниб, “Reuters” хабар берди.

Нашрнинг ёзишича, Вашингтон томонидан тайёрланган санкциялар “Газпром”, табиий ресурслар билан ишловчи айрим йирик компаниялар ҳамда банк соҳасидаги фирмаларни қамраб олади. Бироқ бу чоралар Трамп томонидан маъқулланиш-маъқулланмаслиги ҳали аниқ эмас.

“Бу тўлиқ унинг қарори”, деган АҚШ расмийларидан бири.

Бошқа бир манба эса санкция жараёнида АҚШ Миллий хавфсизлик кенгаши ҳам иштирок этаётганини, у Россияга қарши қўшимча жазоловчи чораларни мувофиқлаштиришга уринаётганини қўшимча қилган.

“Президент бошиданоқ тўлиқ ва кенг қамровли ўт очишни тўхтатишга содиқлигини аниқ баён қилган. Биз ҳозирги музокараларнинг тафсилотларини изоҳламаймиз”, деган Кенгаш вакили Жеймс Хьюитт.

Бунгача “Bloomberg” манбалари ҳам Трамп жамоаси Россияни тинчлик музокараларига мажбурлаш учун иқтисодий босимни кучайтириш бўйича бир нечта сценарий ишлаб чиққанини хабар берган, аммо тафсилотлар келтирилмаган.

Эслатиб ўямиз, аввалроқ республикачи сенатор Линдси Грэм Кремль урушни тўхтатмаса, АҚШ Сенати Россияга қарши “ҳалокатли” санкцияларни, жумладан Россия нефть, газ ёки уранини харид қилувчи давлатлардан АҚШга олиб кириладиган маҳсулотларга 500 фоизлик бож жорий этилишини қўллаб-қувватлашини билдирган эди.