АҚШ Эрон билан боғлиқ 13 та кемани йўқ қилди

АҚШ Қуролли кучлари сўнгги 12 ҳафта ичида Эронга нисбатан жорий этилган денгиз блокадасини бузишга уринган ёки Эрон Ислом инқилоби қўриқчилари корпуси билан боғлиқ бўлган 13 та тижорат кемасини йўқ қилган. Бу ҳақда жорий йилнинг 5 октябрь куни АҚШ Марказий қўмондонлиги (CENTCOM) ўзининг расмий сайтида эълон қилди.

“5 октябрь куни АҚШ Марказий қўмондонлиги кучлари Эронга нисбатан давом этаётган денгиз блокадасини қатъий таъминлаш доирасида Яқин Шарқдаги 130 та тижорат кемасининг йўналишини ўзгартирди”, дейилади баёнотда.

CENTCOM кучлари Олий Бош қўмондон кўрсатмасига биноан жорий йилнинг 14 июль куни Эрон портларига киришга ёки улардан чиқишга уринаётган кемаларга қарши блокадани қайта тиклаган. 130 та кеманинг йўналишини ўзгартиришдан ташқари, Америка кучлари бойкотга бўйсунишдан бош тортган учта кемани ишдан чиқарган.

“АҚШ ҳарбийлари ушбу миссияга қатъий эътибор қаратмоқда. Биз блокадани бузишга уринаётган ҳар қандай кемага қарши тезкорлик билан чора кўрамиз. Кучларимиз юқори даражада тайёрланган, профессионал ва ҳалокатли кучга эга”, деган CENTCOM қўмондони адмирал Бред Купер.

Шунингдек, баёнотда барча денгизчиларга Уммон кўрфази ва Ҳормуз бўғозига яқинлашаётганда “Денгизчиларга огоҳлантириш” кўрсатмаларини кузатиб бориш ва АҚШ денгиз кучлари билан боғланиш тавсия этилган.

Эслатиб ўтамиз, аввалроқ Қора денгизда дрон зарбасига учраган Туркиянинг “Royad Mammadov” кемаси чўкиб кетгани ҳақида хабар берилган эди.