Туркия кемаси дрон зарбаси оқибатида чўкиб кетди. Қурбонлар бор

Қора денгизда дрон зарбасига учраган Туркиянинг “Royad Mammadov” кемаси чўкиб кетди. Бу ҳақда “Informat.ro” хабар берди.

Руминия Ички ишлар вазирлиги маълумотига кўра, бугун, 5 октябрь куни соат 11:00 атрофида Руминиянинг иқтисодий эксклюзив ҳудудида, Сфинту Георге шаҳридан қарийб 30 денгиз мили жанубда жойлашган савдо кемасида ёнғин чиққани ҳақида хабар келиб тушган.

Шундан сўнг, Констанца денгиз қутқарув маркази хавф остидаги экипаж аъзоларини қутқариш учун операция бошлаган. Соҳил қўриқлаш хизмати кемаси қутқарув ишларини мувофиқлаштирган.

Қайд этилишича, қутқарув ишларига Руминия Ички ишлар вазирлигининг авиация бўлинмаси ҳам жалб қилинган. Вертолёт ёрдамида 11 нафар экипаж аъзоси қутқарилган. Жароҳатланганлар махсус трос ёрдамида вертолётга олиб чиқилиб, шошилинч тиббий ёрдам кўрсатиш учун олиб кетилган.

Бундан ташқари, икки нафар экипаж аъзосининг жасади аниқланган. Ҳозирча кемага дрон зарбаси қандай шароитда берилгани ва унинг кимга тегишли экани ҳақида маълумот берилмаган.

Эслатиб ўтамиз, аввалроқ Конго Демократик Республикасида қарийб 100 кишини олиб кетаётган кема Танганьика кўлида ағдарилиб, 41 киши ҳалок бўлгани ҳақида хабар берилган эди.