АҚШ электрон қурилмаларга божни бекор қилди

north_east

Трамп савдо урушида тўсиққа учради. Хитой ён беришни истамаяпти

АҚШ смартфонлар, компьютерлар ва бошқа бир қатор электрон қурилмалар ҳамда уларнинг компонентларини ўзаро бож тўловларидан озод қилди. Бу ҳақда мамлакат божхона ва чегара хизматининг янгиланган кўрсатмасида сўз боради.

“Импорт қилувчилар ҳал қилинмаган аризалар бўйича якуний ҳисоботларга тузатишлар киритиш ёки ҳал қилинган аризалар учун муддати тугамаган бўлса, норозилик билдириш орқали тўловларнинг қайтарилишини талаб қилишлари мумкин”, дейилади ҳужжатда.

Шундай қилиб, бождан озод қилиш 5 апрелдан бошлаб амалга оширилган импорт товарларига тааллуқли бўлади. Ҳужжатда 20 та товар классификацияси коди келтирилган бўлиб, уларга ноутбуклар, планшетлар, смартфонлар, модемлар, ташқи қаттиқ дисклари, флеш-хотиралар, мониторлар, транзисторлар, ўзгартиргичлар (конверторлар) ва бошқа ярим ўтказгич қурилмалар киради.

CNBC нашрининг ёзишича, АҚШ Президенти Дональд Трамп томонидан жорий этилган бож тўловлари Apple каби йирик технологик компаниялар учун энг салбий оқибатларга олиб келиши мумкин эди. Савдо уруши кескинлашганидан сўнг, АҚШнинг Хитой импортига нисбатан бож ставкалари 145 фоизгача ошган, Пекин эса 125 фоизлик жавоб божларини жорий қилган эди. Evercore ISI инвестиция компанияди маълумотига кўра, Хитойда iPad’ларнинг 80 фоизи, Mac компьютерларининг ярми ишлаб чиқарилади. Бундан ташқари, iPhone смартфонларининг тахминан 90 фоизи ҳам Хитойда якуний йиғувдан ўтади. Apple ишлаб чиқаришни АҚШга кўчирса, смартфон нархи 1000 доллардан 3500 долларгача ошиб кетиши мумкин эди.

CNBC'нинг ёзишича, келажакда электроника учун қўшимча божлар жорий этилиши мумкин, бироқ улар Хитойга нисбатан амалда бўлган 145 фоизли ставкалардан анча паст бўлади.

Эслатиб ўтамиз, Трамп умумий ҳисобда 211 та мамлакат ва ҳудуддан олиб кириладиган маҳсулотларга 50 фоизгача бож белгилаган эди https://qalampir.uz/news/tramp-uzbekiston-tovarlariga-ҳam-bozh-zhoriy-k-ildi-116879 . Бу чоралар 5 апрель куни кучга кирган. Оқибатда дунё бўйлаб фонд бозорларида кескин пасайиш кузатилган, кўплаб давлатлар, жумладан Хитой, жавоб чораларини кўрган эди. Бунинг фонида Apple акциялари 23 фоизга арзонлашган, бу 2000 йилдан бери энг ёмон кўрсаткич бўлганди. Шунингдек, Смартфонлар нархи кескин ошиб кетишидан чўчиган харидорлар дўконларда iPhone харид қилиш учун оммавий навбат юзага келган эди.

Кейинроқ Дональд Трамп 90 кун давомида савдо бўйича ҳамкорларга нисбатан кенг кўламли божларни жорий этишни тўхтатиб туришини маълум қилди. Бироқ шу муддат ичида ҳар бир мамлакат учун 10 фоизлик бож амал қилади.