Трамп жорий этган божларига 90 кунлик пауза эълон қилди

АҚШ Президенти Дональд Трамп 90 кун давомида савдо бўйича ҳамкорларга нисбатан кенг кўламли божларни жорий этишни тўхтатиб туришини маълум қилди. Бироқ шу муддат ичида ҳар бир мамлакат учун 10 фоизлик бож амал қилади. Бу ҳақда у ўзининг Truth Social ижтимоий тармоғида баёнот эълон қилди.

“Мен 90 кунлик паузани ва шу давр учун кескин камайтирилган 10 фоиз миқдоридаги ўзаро божни тасдиқладим. У дарҳол кучга киради”, деб ёзди Трамп.

Билдирилишича, бу қарор 75 дан ортиқ давлатнинг АҚШдан божлар ва савдо тўсиқлари бўйича музокаралар ўтказишни сўрагани билан боғлиқ. Трампнинг сўзларига кўра, ушбу давлатлар ҳеч қандай жавоб чораси кўрмаган. Бироқ Хитой бу борада бошқа йўл тутган: у жавоб тариқасида божлар жорий қилгани боис, унга нисбатан бож ставкаси 125 фоизгача кўтарилган.

Маълумот учун, божлар жорий этилганидан сўнг Трампни президентлик сайловларида қўллаб-қувватлаган америкалик миллиардерлар ҳам огоҳлантирувчи баёнотлар билан чиқди. “The Washington Post”нинг ёзишича, ҳатто Илон Маск ҳам бу масала юзасидан шахсан Президентга мурожаат қилган.

Америкалик миллиардер Билл Экман икки кун олдин, 7 апрель куни Трампга 90 кунлик пауза эълон қилишни таклиф этган. Унга кўра, божлар туфайли АҚШ бизнес етакчилари ишончини йўқотмоқда.

“Бу қарорнинг бизнинг мамлакатимизга ва Президентни қўллаб-қувватлаган миллионлаб америкаликларга, хусусан, иқтисодий жиҳатдан босим остида яшаётган кам даромадли истеъмолчиларга таъсири ниҳоятда салбий бўлади. Биз бундай нарса учун овоз бермаган эдик”, деган Экман.

Эслатиб ўтамиз, Трамп 2 апрель куни аксарият мамлакатлар товарларига божлар жорий этилишини эълон қилган эди. Рўйхатда 180 га яқин давлат ва ҳудудлар бўйича бож ставкалари келтирилган. Улардан энг юқори божлари Вьетнам (46 фоиз), Шри-Ланка (44 фоиз) ва Камбоджа (49 фоиз) учун белгиланган. Кўпчилик давлатлар, жумладан Ўзбекистон учун 10 фоизлик ставка белгиланган. Россияга нисбатан эса ҳеч қандай бож жорий қилинмаган.

 АҚШ Президентининг бу қарорига жаҳон ва Осиё молия бозорлари кескин салбий муносабат билдирди – асосий фонд биржалари индекслари рекорд даражада пасайди.