Аббосбек Файзуллаев ҳам “Башакшеҳир”га ўтди

Ўзбекистон терма жамоаси аъзоси ва Россиянинг ЦСКА клуби футболчиси Аббосбек Файзуллаев Истанбулнинг “Башакшеҳир” клубига ўтди. Бу ҳақда “Sport-Exspress” хабар берди.

Маълум қилинишича, Файзуллаевнинг трансфер суммаси 7,5 миллион еврони ташкил этган. ЦСКА 21 ёшли футболчи учун тўловни турк клубидан бир марталик тўлиқ тўлов шаклида олган. 

ЦСКА бугун, 21 июль куни Россия Премьер Лигаси доирасида “Оренбург”га қарши майдонга тушади. Файзуллаев ушбу баҳс учун қайдномага киритилмаган.

Ҳозирча Файзуллаев Истанбул клуби билан қанча муддатга шартнома имзолагани очиқланмаган. 

Маълумот учун, Аббосбекнинг ЦСКА билан тузган шартномаси келаси йилнинг ёзида якунланади. 21 ёшли футболчи жорий мавсум 39 та учрашувда майдонга тушди. Унинг ҳисобида 3 та гол ва 7 та голли узатма бор. 

Эслатиб ўтамиз, аввалроқ ўзбекистонлик 29 ёшли хужумчи Элдор Шомуродов Италиянинг “Рома” клубидан Туркиянинг Истанбул шаҳри шарафини ҳимоя қилувчи “Башакшеҳир” клубига кўчиб ўтгани хабар қилинганди. Истанбул клуби Шомуродовни 2025-2026 йилги мавсум сўнгига қадар сотиб олиш имконияти билан ижарага олган.