19 ёшли қиз севгилисининг тилини тишлаб, узиб олди

Қирғизистонда ғайритабиий ва ҳайратланарли ҳодиса юз берди. Жорий йилнинг 8 ноябрь куни Манас туманида 19 ёшли қиз 26 ёшли севгилисининг тилини тишлаб, узиб олди. Бу ҳақда “Kaktus.media” хабар берди.

Жалолобод вилояти клиник шифохонаси директори Қумар Ботокараев йигит оғир жароҳат билан олиб келинганини тасдиқлаган.

“Йигитнинг тил учидан ва пастки лабининг бир қисми чайнаб ташланган. Бемор операция қилинди, зарар кўрган жойлар тикланди. Ҳозир у жағ-юз жарроҳлиги бўлимида даволанмоқда. Тил тикланиши мумкин. Бундай жароҳатлар эпилепсия ҳолатларида учрайди, лекин ўпишиш пайтида – бу менинг амалиётимда биринчи марта”, дейди шифокор.

Ички ишлар бўлими ҳодиса Жиноятлар ва ҳуқуқбузарликлар ягона реестрида қайд этилганини ва тергов бошланганини маълум қилган. Полиция маълумотларига кўра, жабрланувчи С.Н. 1999 йилда туғилган, қиз эса – А. Ж. 2006 йилда туғилган. Ҳодиса куни улар дўстининг тўйида бўлган ва спиртли ичимлик истеъмол қилган.

“Ўпишиш пайтида қиз йигитни тишлаб, пастки лаб ва тилини шикастлаган. Аниқланишича, ҳодиса иштирокчилари онгли ва руҳий касалликларга эга эмас”, дейди ҳуқуқ-тартибот органлари.

Манас Ички ишлар бўлими тергов хизмати суд-тиббий экспертиза тайинлаган, тергов ишлари давом этмоқда.

Эслатиб ўтамиз, аввалроқ Туркияда 19 ёшли йигит икки маъшуқасининг бошини кесиб, кейин ўз жонига қасд қилганди.