Ҳаммани огоҳлантиринг: Венесуэла ҳужумга учради – Колумбия Президенти

Бугун, 3 январь куни Колумбия Президенти Густаво Петро Венесуэла пойтахти Каракас ҳарбий ҳужумга учраётганини маълум қилди. Бу ҳақда у ўзининг Х ижтимоий тармоғидаги саҳифасида ёзди.

“Ҳозир айни пайтда Каракас ҳужум остида. Бутун дунёни огоҳлантиринг: Венесуэла ҳужумга учради! Ракета зарбалари берилмоқда. Америка давлатлари ташкилоти ва БМТ зудлик билан йиғилиш ўтказиши керак”, деб ёзди Густаво Петро.

Эслатиб ўтамиз, бугун, 3 январь куни эрталабдан бери Венесуэла пойтахтида ва мамлакатнинг бошқа аҳоли пунктларида портлашлар овози эшитилмоқда. Вазият юзасидан Вашингтон ва Каракас ҳозирча расмий изоҳ бермади.

2025 йил куз бошида АҚШ Кариб денгизи ҳудудига ўзининг энг замонавий “Gerald Ford” авиация ташувчисини, эсминецлар ва қирувчи самолётларни юборган эди. Сентябрь ойидан буён гиёҳванд моддалар ташиётган кемаларга зарбалар берилмоқда. АҚШ Президенти Дональд Трамп маъмурияти Николас Мадурони Венесуэланинг ҳуқуқий президенти сифатида тан олмайди ва мамлакат ҳукуматини наркотрафикка қарши етарлича кураш олиб бормаётганликда айблайди.

17 декабрь куни Трамп Венесуэлага бораётган ва ундан чиқаётган, санкциялар остидаги барча нефть танкерларини тўлиқ блокадага олиш буйруғини берганини эълон қилган.

Сентябрь бошида CNN Трамп Венесуэла ҳудудидаги наркокартелларга зарба бериш вариантини кўриб чиқаётганини хабар берган эди. Бироқ ноябрь ўрталарига келиб, Трамп Венесуэлада қуруқликдаги ҳарбий операция ўтказиш ёки ўтказмаслик бўйича ҳали қарор қабул қилмагани маълум қилинган.