Зинченко учун мавсум якунланди

Украиналик ҳимоячи Александр Зинченко “Аякс” сафидаги илк ўйинидаёқ жиддий жароҳат олди ва мавсумнинг қолган қисмини ўтказиб юборади. Бу ҳақда клуб матбуот хизмати хабар берди.

Нидерландия клуби 29 ёшли футболчига тизза жароҳати ташхиси қўйилганини маълум қилди. Ҳимоя чизиғи вакили операция қилиниши керак бўлади. Хабар қилинишича, Украина терма жамоаси аъзоси тахминан олти ой майдондан четда қолади ва жорий мавсум охиригача ўйнай олмайди. Кўп эҳтимол билан у эҳтимолий Жаҳон чемпионатини ҳам ўтказиб юборади.

Маълумот учун, украиналик футболчи жорий йилнинг 1 февраль куни “Арсенал”дан ижара асосида “Аякс”га қўшилганди. Нидерландия клуби футболчи учун Лондон жамоасига 1,5 миллион евро, шунингдек, Чемпионлар лигасидаги ўйинлар билан боғлиқ бонусларни тўлаши керак эди.

Зинченко мавсумнинг биринчи қисмини “Ноттингем Форест” сафида ижара асосида ўтказиб, 10 та учрашувда майдонга тушган.