Зидан сабаб Франция қонунларга ўзгартириш киритмоқчи

Зинедин Зиданнинг Франция терма жамоаси бош мураббийи этиб тайинланиши янги маош чекловлари сабаб қонунчиликка ўзгартириш киритмоқчи. Бу ҳақда “L’Équipe” нашри хабар берди.

Маълум қилинишича, жорий йилнинг 8 июль куни Франция Сенати ва Миллий ассамблеясининг қўшма комиссияси томонидан қабул қилинган қонунга мувофиқ, миллий терма жамоа бош мураббийининг йиллик маоши 450 минг евродан ошмаслиги керак. Бу эса ҳозирги бош мураббий Дидье Дешам олган маошдан қарийб ўн баробар кам.

Шу боис Франция футбол федерацияси (FFF) Зиданга етакчи мураббийлар даражасида маош таклиф қилиш имконини бериш учун қонунчиликка тегишли ўзгартишлар киритилишини кутмоқда. Бунинг учун Франциянинг спорт, ёшлар ва жамоат ишлари вазири Марина Феррарининг розилиги талаб этилади.

Манбага кўра, федерация мазкур масала бўйича жиддий тўсиқлар бўлишини кутмаяпти ва Зидан 2026 йилги Жаҳон чемпионатидан сўнг Дидье Дешамнинг ўрнини эгаллаши кутилмоқда.

Марина Феррари ҳам Зиданни Франция терма жамоаси учун муносиб номзод деб атади. Шу билан бирга, у якуний қарорни ҳукумат эмас, балки Франция футбол федерацияси қабул қилишини таъкидлади.

Маълумот учун, Дидье Дешам бошчилигида Франция терма жамоаси 186 та учрашув ўтказиб, 122 ғалаба, 32 дуранг ва 32 мағлубият қайд этди. Унинг раҳбарлигида французлар 2018 йилги Жаҳон чемпионатида ғолиб чиққан, 2021 йилда эса Миллатлар лигаси бош совринини қўлга киритган.

Зинедин Зиданнинг сўнгги иш жойи Мадриднинг “Реал” клуби бўлган. Дидье Дешам бошчилигидаги Франция терма жамоасининг сўнгги учрашуви жорий йилнинг 18 июль куни Майами шаҳрида Жаҳон чемпионатининг учинчи ўрни учун Англияга қарши бўлиб ўтади.