Зидан GOAT ҳақидаги баҳсга нуқта қўйди

Франция терма жамоаси бош мураббийи Зинедин Зидан Лионель Мессининг 2026 йилги “Олтин тўп” учун имкониятларига юқори баҳо берди ва бу соврин Мессига берилса ҳайрон бўлмаслигини айтди. Бу ҳақда Зидан “Goal” нашрига берган интервьюсида сўз очди.

Аввалроқ, Месси “Олтин тўп” учун 30 нафар номзоддан иборат якуний рўйхатдан жой олган эди. Зидан эса аргентиналик футболчига овоз беришга тайёрлигини таъкидлади.

“Мен Месси учун 100 марта овоз берган бўлардим. Одамлар 39 ёшда ҳам дунёнинг энг яхши футболчилари қаторида қолиш қанчалик ақл бовар қилмас натижа эканини тушунишмайди”, дейди Зидан.

У Месси навбатдаги бор “Олтин тўп”ни қўлга киритса, ажабланмаслигини таъкидлаган. Зиданнинг фикрича, ҳанузгача тарихдаги энг буюк футболчи ким эканига шубҳа қилаётганлар ушбу спорт турини етарлича тушунмайди.

“Агар кимдир ҳалигача GOAT (тарихдаги энг буюги) кимлигига шубҳа қилаётган бўлса, очиғини айтганда, бу инсон футбол ҳамжамиятидан эмас”, деб қўшимча қилган Зидан.

Маълумот учун, Месси 2026 йилги “Олтин тўп” учун 17-марта номзод бўлди. У мазкур совринни рекорд даражада саккиз марта қўлга киритган. 2026 йилги “Олтин тўп” маросими жорий йилнинг 26 октябрь куни Лондонда бўлиб ўтади.

Эслатиб ўтамиз, аввалроқ “Олтин тўп” соврини учун якуний 30 та номзод эълон қилингани ҳақида хабар берилганди.