Жотанинг ўлимига оид янги тафсилотлар эълон қилинди (видео)

Аввалроқ, Англиянинг “Ливерпуль” клуби ва Португалия терма жамоаси ҳужумчиси Диогу Жота ҳамда унинг укаси йўл-транспорт ҳодисаси оқибатида ҳалок бўлгани хабар қилинганди. Автоҳалокатга сабаб Lamborghini автомобилидаги шинанинг ёрилиши бўлган. Бу ҳақда Испания Фуқаролик гвардияси маълумотларига таяниб, BBC Sport хабар берди.

Манба маълумотига кўра, Жота ва унинг укаси Испаниянинг Самора вилоятида маҳаллий вақт билан тахминан соат 00:30 да вафот этган. Улар Lamborghini автомобили билан кетаётганда бошқа транспорт воситасини қувиб ўтиш чоғида шина ёрилиши оқибатида бошқарувни йўқотган ва кейинроқ ёниб кетган.

Маълумот учун, май ойида Диогу Жота Англия чемпиони бўлган, июнь ойида эса Португалия терма жамоаси билан иккинчи бор Миллатлар Лигаси ғолиблигини қўлга киритган эди. 22 июнь куни футболчи турмуш қурган. Эр-хотин уч нафар фарзандни тарбиялаётган эди.

Жота 2020 йилда “Вулверхэмптон”дан “Ливерпуль”га 44,7 миллион еврога ўтган. У “Ливерпул” сафида Англия чемпиони, Англия кубоги соҳиби ва икки карра Лига кубоги ғолиби бўлган. Бунгача у Португалиянинг “Порту” ҳамда Испаниянинг “Атлетико” жамоаларида тўп сурган. Португалия терма жамоаси таркибида 49 ўйин ўтказиб, 14 та гол урган.

Укаси Андре Силва эса 25 ёш эди. У 2023 йилда Португалиянинг 2-дивизионидаги “Пенафиел” клубига ўтган. Бу жамоа сафида ярим ҳимоячи сифатида 62 та учрашувда майдонга тушган.