“Ливерпуль” Юрген Клопп шарафига бронза ҳайкал ўрнатди

Жорий йилнинг 8 октябрь куни “Энфилд” стадиони музейида “Ливерпуль”нинг собиқ бош мураббийи Юрген Клоппнинг клуб тарихига қўшган улкан ҳиссасига бағишланган бронза ҳайкалининг расмий очилиш маросими бўлиб ўтди. Бу ҳақда клуб матбуот хизмати хабар берди.

Бронза ҳайкалда немис мураббийининг ўзига хос фалсафаси, шижоати ва ғалабадан кейинги рамзий ишораси акс эттирилган. Клопп раҳбарлигида “Ливерпуль” Европа футболидаги етакчи мавқеини қайта тиклаб, кўплаб совринларни қўлга киритди.

Клуб раҳбарияти мазкур ёдгорлик Юрген Клоппга, шунингдек, жамоанинг ғалабаларга бўлган ишончини қайта тиклагани ва муваффақиятли анъаналарини давом эттиргани учун мухлислар номидан билдирилган самимий эҳтиром эканини таъкидлади.

Маълумот учун, Юрген Клопп 2015-2024 йилларда “Ливерпуль”ни бошқарган. Унинг раҳбарлигида жамоа UEFA Чемпионлар лигаси, UEFA Суперкубоги ва FIFA клублар ўртасидаги жаҳон чемпионатида ғолиб чиққан. Шунингдек, 2020 йилда Англия Премьер-лигасида чемпионликни қўлга киритиб, клубнинг 30 йиллик олий лига титулини кутиш даврига чек қўйган.