“Ливерпуль” Жотага ёдгорлик ўрнатди

Англиянинг “Ливерпуль” жамоаси ўзининг собиқ футболчиси Диогу Жота ҳамда унинг укаси Андре Силва хотирасига бағишлаб ёдгорлик ўрнатди. Бу ҳақда клуб матбуот хизмати хабар берди.

Ёдгорлик лента шаклидаги юрак кўринишида ишланган бўлиб, турли томондан қаралганда футболчиларнинг форма рақамлари – 20 ва 30 сонлари ҳам кўринади. Лентага “20 Forever” (“20 абадий”) деган ёзув туширилган.

Ёдгорлик ўрнатилган пойдеворда ҳам шу ибора, шунингдек, мухлислар ҳар бир ўйиннинг 20-дақиқасида куйлайдиган қўшиқ сатрлари акс эттирилган. Пойдевор қисмида эса “Энфилд” мухлислари қолдирган кўплаб ёдгорлик буюмлари сақланади.

Ҳайкалда Жотанинг футболдан ташқаридаги ҳаёти ҳам акс эттирилган. Жумладан, пойдеворда унинг видеоўйинларга қизиқишини ифодаловчи “плейстейшен” пульти тасвири жойлаштирилган.

Ёдгорликнинг очилиш санаси кейинроқ маълум қилинади. У “Энфилд” яқинидаги 97 проспект ҳудудига ўрнатилади. Айнан шу жойда мухлислар футболчиларнинг вафотидан сўнг гуллар ва эсдалик буюмларини қолдирган.

Маълумот учун, Жота 2025 йилнинг 3 июль куни Испанияда юз берган автоҳалокат оқибатида вафот этган эди. У укаси Андре билан бирга кетаётган Lamborghini автомобили қувиб ўтиш вақтида ғилдираги ёрилиб, йўлдан чиқиб, автомобиль ағдарилиб, ёниб кетган.