Роналду Жотани масхара қилган мухлисларни жазолашга чақирди

Беш карра “Олтин тўп” соҳиби Криштиану Роналду Саудия Арабистони Футбол Лигасини “Ал-Ҳилол”га қарши ўйинда “Ал-Таавун” мухлисларининг хатти-ҳаракатларига муносиб баҳо беришга чақирди. Бу ҳақда Роналду “LiveMode TV”нинг Instagram’даги постига изоҳ қолдирди.

Учрашув жорий йилнинг 12 сентябрь куни бўлиб ўтди ва “Ал-Ҳилол”нинг 6:0 ҳисобидаги ғалабаси билан якунланди. Ўйин давомида “Ал-Таавун” мухлислари “Ал-Ҳилол”нинг португалиялик ярим ҳимоячиси Рубен Невешни унинг марҳум ватандоши Диогу Жотанинг номини тилга олиб, жаҳлини чиқаришга уринди. Футболчи эса бунга жавобан осмонга ишора қилди. Манба ушбу ишорани “Худо ҳамма нарсани кўриб турибди” дея талқин қилган.

“Лига бу ҳолат бўйича чора кўриши ва мухлисларни бундай хатти-ҳаракатлари учун жазолаши керак. Бу энди футбол эмас. Қабул қилиниши мумкин бўлган хатти-ҳаракатларнинг чегараси бўлиши керак. Бундай йўл тутган инсонлар ҳеч қачон стадионга киритилмаслиги лозим”,  деб ёзди Роналду.

Маълумот учун, Диогу Жота 2025 йил июль ойида укаси билан бирга йўл-транспорт ҳодисасида ҳалок бўлган. Ўша вақтда португалиялик футболчи 28 ёшда эди.

Жота 2020 йилдан буён “Ливерпуль” сафида тўп тепиб келган. У жамоа билан Англия чемпионати, Англия Кубоги ва Лига Кубогида ғолиб чиққан. Шунингдек, Португалия терма жамоаси билан икки марта Миллатлар лигасида чемпион бўлган.

Жота фаолияти давомида Испаниянинг “Атлетико Мадрид”, Португалиянинг “Порту” ва Англиянинг “Вулверхэмптон Уондерерс” клубларида ҳам ўйнаган.