ЖЧ ярим финал ўйиндан кейин Францияда тартибсизликлар бошланди

Ниццада Франция терма жамоаси Қатардаги Жаҳон чемпионати ярим финалида марокашликларни мағлуб этганидан сўнг, мухлислар ўртасида тўқнашув келиб чиқди. Бу ҳақда "Le Figaro" газетаси хабар берди.

Қайд этилишича, ўйин якунланганидан сўнг бир неча гуруҳлар иштирокида Массена майдонида муштлашув содир бўлган. Асосан франциялик ва марокашлик ёш қатлам ўртасида жанжал бўлгани қайд этилди. Можаро иштирокчилари бир-бирига қарата пиротехника воситалари, тош ва шиши идишларни отган. Воқеа жойига етиб келган полиция агрессив оломонни тарқатиш учун кўздан ёш оқизувчи газдан фойдаланган.

Шунингдек, ОАВ Монпелье ва Авиньон шаҳарларида мухлислар ўртасидаги тўқнашувлар бўлиб ўтгани ҳақида хабар бермоқда. Париждаги Елисей майдонида ҳам катта оломон тўпланган, бироқ у ерда кўп сонли полициячилар навбатчилик қилаётгани учун тартибсизликлар кузатилмагани маълум бўлди.

Франция терма жамоаси Жаҳон чемпионати ярим финалида Марокашни 2:0 ҳисобида мағлуб этди ва ўз тарихида тўртинчи бор Жаҳон чемпионати финалига чиқди.