Жанубий Кореянинг собиқ президенти КХДРга ёрдам берганликда айбланди

Жанубий Корея прокуратураси собиқ президент Юн Сок Ёлга қўшимча айбловлар қўйди. У ўз ваколатини суиистеъмол қилганликда ва душман давлатга, хусусан, Шимолий Кореяга ёрдам берганликда айбланмоқда. Бу ҳақда “Yonhap” хабар берди.  

Тергов маълумотларига кўра, собиқ президент Шимолий Кореяни ҳарбий ҳаракатларга чорлаш ва шу орқали ҳарбий ҳолат эълон қилиш учун баҳона яратиш мақсадида ўтган йилнинг октябрь ойида Пхеньянга дронлар билан ҳаво ҳужуми уюштиришни буюрган. Учирилган учувчисиз самолёт Пхеньян яқинида қулаган, бу эса, айбловнинг таъкидлашича, ҳарбий сирларнинг ошкор этилишига олиб келган.

Нашрнинг қайд этишича, Шимолий Кореяга ёрдам бериш айблови қўшни давлат билан тил бириктиришнинг ҳақиқий далилларини талаб қилмайди. Ёрдамчи айблов мамлакат ҳарбий манфаатларига ҳар қандай зарар етказилганда қўлланилиши мумкин. Собиқ мудофаа вазири Ким Ён Хён ва Қуролли кучлар қарши разведка қўмондонлигининг собиқ раҳбари Ё Ин Хён ҳам бу борада айбланган.

2024 йилнинг декабрида Юн Сок Ёль мамлакатда ҳарбий ҳолат жорий қилган, шундан сўнг парламент унга импичмент эълон қилган. Собиқ президент давлат тўнтаришини уюштирганликда айбланиб, январь ойида ҳибсга олинган эди.

Эслатиб ўтамиз, аввалроқ Жанубий Корея Президенти Ли Чжэ Мён мамлакат конституциясида кўрсатилганидек, Корея Халқ Демократик Республикасига (КХДР) тинч йўл билан бирлашув тарафдори эканини айтганди. Орадан бир ҳафта ўтгач, у яна бир бор Пхеньян билан бузилган алоқаларни тиклашга чақирди.