Жанубий Африкада мигрантларга қарши намойишлар ўтказилди

Кеча, 30 июнь куни Жанубий Африкада ноқонуний муҳожирлар мамлакатни тарк этиши учун белгиланган муддат тугагани сабабли мамлакатнинг турли шаҳарларида мигрантларга қарши оммавий намойишлар бўлиб ўтди. Бу ҳақда “Reuters” хабар берди.

Намойишчилар мамлакат байроқларини кўтариб, анъанавий ёғоч, таёқ ва қуроллар билан шаҳар кўчаларида юриш қилган. Улар ноқонуний муҳожирларни Африкани тарк этишга чақирган.

Сўнгги ойларда кучайган мигрантларга қарши кайфият фонида минглаб хорижликлар белгиланган муддатдан олдин мамлакатни тарк этган. Янги тартибсизликлар хавфи сабабли кўплаб дўконлар ёпилган, хорижликлар эса ишга чиқмаган.

Намойишларни ташкил этган “March and March” ҳаракати раҳбари Жасинта Нгобесенинг айтишича, ноқонуний муҳожирлар мамлакатдан чиқарилмагунча ҳар ҳафта норозилик намойишлари ўтказилади. Намойишчилар хорижликларни маҳаллий аҳолининг иш ўринларини эгаллаб олаётгани ва давлат ресурсларига босим ўтказаётганини даъво қилмоқда.

Йоханнесбург яқинидаги Тембиса туманида намойишчилар полиция ва муҳожир деб гумон қилинган шахсларга тош отган, шаҳар маркази яқинида ўқ овозлари эшитилган. Бенони ҳудудида полиция юзлаб намойишчиларни тарқатиш учун махсус техника ва ўқотар қуроллардан огоҳлантириш сифатида фойдаланган. Советода хорижликларга тегишли уйлар талон-торож қилинган. Питермарицбург шаҳрида эса полиция намойишчиларни тарқатиш учун резина ўқлардан фойдаланган.

“Reuters” маълумотларига кўра, ҳозиргача камида 4 киши ҳалок бўлган, минглаб хорижликлар уйларини тарк этишга мажбур бўлган. Март ойидан буён хорижликларга қарши ноқонуний ҳаракатлар юзасидан 103 та жиноят иши қўзғатилган.

Жанубий Африка президенти Сирил Рамафоса фуқароларнинг ноқонуний иммиграция борасидаги хавотирлари асосли эканини билдирган. Шу билан бирга, у норозилик намойишлари таҳдид, зўравонлик ва вандализмга айланмаслиги кераклигини таъкидлаган.

Эслатиб ўтамиз, аввалроқ суданлик мигрант Британиянинг Белфаст шаҳрида 40 ёшли эркакка пичоқ билан ҳужум қилганидан сўнг, мамлакатнинг турли ҳудудларида маҳаллий аҳолининг оммавий норозилик намойишлари бошланиб кетган эди.