Зеленский Си Цзиньпин билан суҳбатининг тафсилотларини ошкор қилди

Украина Президенти Владимир Зеленский Хитой раҳбари Си Цзиньпин билан телефон суҳбатига изоҳ берди ва у билан шахсий учрашувни муҳокама қилмаганлигини айтди. Бу ҳақда у Чехия Президенти Петр Павел ва Словакия Президенти Зузана Чапутова билан бирга ўтказган матбуот анжуманида гапирди.

Зеленскийнинг сўзларига кўра, улар Хитой Коммунистик партияси раҳбари билан эҳтимолий учрашувни муҳокама қилмаган, аммо улар тинчлик формуласи, маҳбусларни озод қилиш, ядровий хавфсизлик, дон экспорти ва Россияга қурол етказиб бериш имкониятлари ҳақида гаплашган.

“Биз муҳим нарсаларни суҳбатлашдик. Келгуси учрашувларга келсак, бу ҳақда гаплашмадик”, деган Украина Президенти.

Бундан ташқари, Зеленский суҳбат давомида Хитой раҳбарини асирга олинган украиналиклар ва Россия томонидан олиб кетилган болаларни қайтаришга ёрдам беришга чақирганини таъкидлаган.

Эслатиб ўтамиз, олдинроқ Зеленский Си Цзиньпин билан телефонда мулоқот ўтказган, БМТ эса мазкур суҳбатни ижобий баҳолаган эди.