Зеленский Путинга музокаралар олиб боришни таклиф қилди

Киев Москвага можарога ечим топиш ва кўтарилган масалаларни ҳал этиш бўйича янги музокаралар ўтказишни таклиф қилди. Бу ҳақда Украина Президенти Владимир Зеленский ўзининг кечки видеомурожаатида маълум қилди.

Унинг сўзларига кўра, айни пайтда Россия томони билан яна бир маҳбус алмашинуви бўйича мулоқот олиб борилмоқда. Зеленский музокаралар динамикаси аста-секин ўсиб бориши кераклигини таъкидлади.

“Биз ўт очишни тўхтатиш учун ҳамма нарсани қилишимиз керак”, деди давлат раҳбари.

Сиёсатчининг қўшимча қилишича, етакчилар – Украина ва Россия раҳбарлари даражасидаги учрашув зарур.

“Буларнинг барчаси ҳақиқатан ҳам тинчликни таъминлашга ёрдам беради – ҳақиқатан ҳам узоқ муддатли тинчликни. Украина бундай учрашувга тайёр”, дея хулоса қилди у.

Украина Миллий хавфсизлик ва мудофаа кенгаши котиби Рустам Умаров Москвага музокараларнинг кейинги босқичини келаси ҳафтага белгилашни таклиф қилди.

Москва бунга жавобан Россия Украина билан икки томонлама мулоқотнинг янги босқичига тайёрлигини билдирди.

“Биз узоқ вақтдан бери тайёр эдик ва Киевдан келган сигналлар яқин орада аниқ сана пайдо бўлишига умид қилиш имконини беради”, дейди Россия вакили РИА Новостига.

Ўз навбатида, ТАСС манбаси ҳам делегациялар учрашувининг аниқ санаси ҳали белгиланмаганини тасдиқлади.

Маълумки, 2 июнь куни Истанбулда Россия ва Украина вакиллари ўртасида тўғридан тўғри музокараларнинг иккинчи раунди бўлиб ўтганди. Томонлар оғир яраланган аскарлар ва 25 ёшгача бўлган асирларни алмашиш, шунингдек, урушда ҳалок бўлган 6000 нафар ҳарбий хизматчиларнинг жасадини бир-бирига топширишга келишиб олди.

Шундан сўнг, бир қатор ҳарбий асирлар алмашинуви бўлиб ўтди – хусусан, 9, 10, 12, 19 ва 20 июнь кунлари. Шу билан бирга, ўликларнинг жасадларини алмаштириш давом этмоқда.