Зеленский Киевдан қочишни ўйлаб қўйганми?

Украина Президенти Владимир Зеленский ва ҳукумат тузилмалари Киевдан эвакуация қилинмаяпти. Бу ҳақда Украина Президенти девони раҳбари маслаҳатчиси Михаил Подоляк маълум қилди.

“Бу мумкин эмас, чунки Зеленский бу ерда охиригача бўладиган одамлар тоифасига киради. Албатта, эвакуация йўллари тақдим этилган, лекин биз улардан фойдаланмаймиз”, деган Подоляк Президентнинг мамлакатни тарк этиши мумкинлиги ҳақидаги саволга жавоб бераркан.

Шу билан бирга, РБК мухбири билан суҳбатдан сўнг амалдор узр сўраган ва ҳукумат қароргоҳи эвакуация қилинаётгани сабабли идорани тарк этиши кераклигини айтган.

“Бу Голливуд фильми эмас, бу Netflix платформаси эмас, бу ҳақиқий уруш. Бизни ўлдириш учун келинг - бизни ўлдиринг, лекин биз Киев шаҳридан чиқмаймиз, ўзимизни ҳимоя қиламиз”, дея қўшимча қилган расмий.

Россиянинг Украинага босқини

Жорий йилнинг 21 февраль куни Россия Президенти Владимир Путин Кремлда Украина шарқидаги ўзини мустақил деб эълон қилган Луганск халқ республикаси (ЛХР) ва Донецк халқ республикасини (ДХР) тан олиш тўғрисидаги фармонни имзолади. Кейинроқ РФ республикаларни шу номдаги вилоятлар чегарадаги тан олганини таъкидлаб, Украинага қарши уруш хавфини ошириб юборди.

Путиннинг фавқулодда қарори ортидан АҚШ, ЕИ, Канада, Австралия, Буюк Британия ва Япония расмийлари ҳам Россияга қарши санкциялар киритди.

24 февраль куни Россия Президенти Владимир Путин Украина шарқида Донбассда рус ҳарбийлари "махсус ҳарбий операция" бошлаганини эълон қилди ва рус қўшинлари Украинага ҳужум бошлади. Путин бу ҳаракатини Украина шарқидаги россияпараст сепаратист кучлар раҳбарлари шундай сўров юборгани билан оқлади.

Бунинг ортидан Зеленский Россия фуқароларига рус тилида мурожаат қилиб, украинларга “на совуқ, на иссиқ, на гибрид уруш керак эмас”лигини, украинлар ҳужумчиларни кутиб олишга тайёрлигини билдирди. Кўп ўтмай Президент Россия билан дипломатик алоқани узди.

Рус қўшинлари дастлаб Киев ва Харьковга ракета ҳужуми уюштирди. Президент Зеленский мамлакатда ҳарбий ҳолат эълон қилди. Шунингдек, расмий идора рус қўшинлари Харьков ва Одесса вилоятига кириб борганини билдирди.

Ҳужум бошланганидан кўп ўтмай, ЛХР Ички ишлар вазири маслаҳатчиси Виталий Киселев Счастье ва Станица шаҳарчалари ЛХР назоратига ўтганини эълон қилди.

Украинага ҳужум бошланиши Россия иқтисодига оғир зарба берди. Рус компаниялари акциялари кескин арзонлашди, Москва биржасида савдолар мислсиз даражада пасайиш билан ўтди. Газпром, ЛУКОЙЛ ва бошқа йирик компаниялар йўқотишларга учради.

25 февраль куни Зеленский Украинада умумий ҳарбий сафарбарлик эълон қилди. Армияга чақирув мамлакатнинг қатор вилоят ва шаҳарларида амалга оширилиши белгиланди.