Зеленский Федоровга янги раҳбарлик лавозимини таклиф қилди

Украина Президенти Владимир Зеленский собиқ Мудофаа вазири Михайло Федоровга мамлакатнинг технологик салоҳиятини бирлаштириш ва уни янада ривожлантириш имконини берадиган раҳбарлик лавозимини таклиф қилди. Бу ҳақда Президент кеча, 21 июль куни эълон қилинган кечки мурожаатида маълум қилди.

“Бугун мен Михайло Федоров билан ҳам учрашдим. Унга мамлакатимизнинг технологик салоҳиятини бирлаштириш ва унинг кейинги ривожланишини таъминлаш имконини берадиган муносиб раҳбарлик лавозимини таклиф қилдим”, деган Зеленский.

Президентнинг айтишича, Мудофаа вазири вазифасини вақтинча бажарувчи Евгений Хмаранинг хавфсизлик соҳасидаги тажрибаси, жанговар ютуқлари, технологик натижалари ҳамда Alpha бўлинмасининг узоқ масофали зарба бериш амалиётлари давлат бошқаруви тизимида айнан зарур бўлган салоҳиятни намоён этмоқда.

Шунингдек, Зеленский барча украиналикларнинг мақсади битта эканини таъкидлаган.

“Барчамизнинг истагимиз битта – душман устидан ғалаба қозониш ва фронтда ҳамда Россияга босим ўтказиш орқали уни тинчликка мажбур қиладиган шароитни яратиш. Эртага ушбу қарорларнинг барчасини расмийлаштирамиз. Украина бу вазиятдан янада кучлироқ чиқиши керак, Россия учун эса вазият янада мураккаблашади”, дея қўшимча қилган у.

Михайло Федоровнинг истеъфоси Украина бўйлаб норозилик намойишларига сабаб бўлган.

Ҳозирча Зеленский Федоровга айнан қайси лавозим таклиф қилинганига аниқлик киритмаган. Бироқ Олий Рада депутати Ярослав Железнякнинг маълум қилишича, у ҳарбий технологиялар бўйича Бош вазир ўринбосари ёки Президентнинг ушбу йўналишдаги маслаҳатчиси бўлиши мумкин. Депутатнинг қайд этишича, Федоров бу таклифга ҳали розилик бермаган.

Эслатиб ўтамиз, аввалроқ Зеленский Бош вазир Юлия Свириденкони бир йил ишлаганидан сўнг лавозимидан озод қилганди. Шунингдек, у давлатнинг энергетика компанияси раҳбарини Бош вазир лавозимига тавсия қилган. Бундан ташқари, Зеленский урушнинг ҳал қилувчи босқичида Мудофаа вазири Михайло Федеровни ҳам ишдан олган. Шу билан бирга Зеленский мамлакат Қуролли кучлари Бош қўмондони Александр Сирскийни лавозимидан озод этиб, унинг ўрнига генерал-майор Михайло Драпатийни тайинлаган.