Зеленский Блинкенга Харьковни ҳимоя қилиш учун нима кераклигини айтди

Украина Президенти Владимир Зеленский бугун, 14 май куни АҚШ Давлат котиби Энтони Блинкен билан учрашувда Харьков ва минтақани ҳимоя қилиш учун ҳаво ҳужумидан мудофаа тизимлари, хусусан Patriot зарурлигини айтди. Бу ҳақда маҳаллий нашрлар хабар берди.

Зеленский ҳаво ҳужумидан мудофаа Украина учун "энг катта камомад ва энг катта муаммо" эканини таъкидлади.

"Ҳозирда бизга Харьков ва минтақа учун иккита Patriot керак, чунки у ердаги одамлар ҳужум остида ва улар бундан жуда хавотирда", дейди Зеленский.

Ўз навбатида, Блинкен Украина “оғир кунларни бошидан ўтказаётганини”, аммо АҚШдан ажратилган ёрдам аллақачон йўлда эканлигини ва тез орада етказилишини айтди.

“Блинкен Зеленскийга янги қурол пакети келаётганини ва ундан ҳам кўпроқ юборилишини, бу эса фронтдаги вазиятни ўзгартиришини айтди”, деб хабар берди “Reuters”. 

Шунингдек, Давлат котиби Қўшма Штатлар Украинанинг вақт ўтиши билан "иқтисодий, ҳарбий ва демократик жиҳатдан" мустақил бўлишини исташини таъкидлади.

Эслатиб ўтамиз, 10 май куни Россия ҳарбийларининг Харьков вилояти чегарасига ҳужуми бошланганди. Президент Владимир Зеленский Ғарбдаги ҳамкорларини Украина ҳимоячиларига ваъда қилинган қуролларни ўз вақтида етказиб беришда қўллаб-қувватлашни давом эттиришга чақирди. АҚШ Президенти Жо Байден эса Киевга 400 миллион долларгача ҳарбий ёрдам ажратиш ҳақидаги фармонни имзолади. Шунингдек, АҚШ Давлат департаменти Украинага учта HIMARS қурилмасини зудлик билан сотишга рухсат берди. Буюк Британия Мудофаа вазирлиги эса Украинага уруш бошланганидан бери энг катта ҳарбий ёрдам пакетини тақдим этишини эълон қилди. Ёрдамнинг навбатдаги партияси тўрт миллион ўқ-дори, 1600 дан ортиқ зарба берувчи ва зенит-ракеталар, шунингдек, 400 та техника, жумладан, 162 та зирҳли техника ва 78 та ерусти техникасидан иборат бўлади.

12 май куни Россия Харьков вилоятидаги Гатише, Красное, Мороховец ва Олейниково қишлоқларини назоратга олганини эълон қилди.