Юн Сок Ёлни ҳибсга олиш ордери бекор қилинди

Бугун, 7 март куни лавозимидан четлатилган Жанубий Кореянинг президенти Юн Сок Ёлни ҳибсга олиш ордери бекор қилинди. Бу ҳақда Сеул суди қарорига таяниб, “Yonhap” хабар берди.

Қайд этилишича, Сеул марказий туман суди унинг ҳибсга олиниши бўйича ордерни бекор қилиб, сиёсатчининг озод қилинишига рухсат берган. Юн Сок Ёль исён ташкил этишда айбланган эди. Бироқ телеканалга кўра, бу жиноят Жанубий Кореянинг юқори мартабали амалдорлар ўртасидаги коррупцияни тергов қилиш агентлиги юрисдиктсиясига кирмайди. Айнан шу агентлик унинг ҳибсга олиниши бўйича ордер сўраган эди. Бундан ташқари, унга қўйилган айблов унинг ҳибсда сақланиш муддати тугаганидан кейин илгари сурилган.

Президентнинг адвокати Сок Дон Хённинг тушунтиришича, прокуратура апелляция бериш имкониятига эга бўлган муддат тугамагунча Юн Сок Ёль озод этилмайди.

“Суд қамоқ жазосини бекор қилиш бўйича қарор чиқарган бўлса-да, президент дарҳол озодликка чиқмайди. Сеул марказий туман прокуратураси етти кун ичида апелляция бериши мумкин. Агар улар бу ҳуқуқдан фойдаланмаса ёки апелляциядан воз кечса, у озод қилинади”, деди адвокат.

Жорий йилнинг 15 январь куни юқори лавозимли амалдорларнинг коррупциясини тергов қилиш бошқармаси Юн Сок Ёлни Сеулдаги қароргоҳида қўлга олди. У ҳарбий ҳолат билан боғлиқ воқеалар туфайли конституциявий тузумга қарши исён уюштиришда айбланган эди. 19 январь куни Сеул ғарбий туман суди давлат раҳбарини ҳибсга олиш тўғрисида қарор чиқарди.

28 февраль куни прокуратура Антикоррупция ишлари бошқармасига тинтув ўтказиш учун келди. Улар президентнинг ҳибсга олиниши ва унга ордер бериш жараёнида қонунбузарликлар бўлган-бўлмаганини текширмоқчи эди. Юн Сок Ёлнинг адвокатлари бошқарма дастлаб Сеул марказий туман судига мурожаат қилиб, рад жавоби олгани, кейин эса Сеул ғарбий туман судига илтимоснома берганини маълум қилди. Президент ҳуқуқшунослари ордер Сеул марказий туман судидан олиниши кераклигини таъкидлаб келган эди.

Эслатиб ўтамиз, 2024 йил 3 декабрь куни Жанубий Корея президенти Юн Сок Ёль мамлакатда ҳарбий ҳолат жорий этган эди. У бу қарорини “конституциявий тартибни ҳимоя қилиш” ва “Шимолий Корея коммунистик кучлари таҳдидидан қочиш” истаги билан изоҳлади.

Ҳарбий ҳолат эълон қилинишига мухолифатдаги Демократик партия етакчиси Ли Же Мён қарши чиқди ва партия аъзоларини парламент биносида тўпланишга чақирди. Кейинчалик парламент бу қарорни бекор қилиш учун овоз берди.

Шундан сўнг, мухолифат президенти истеъфога чиқишга чақирди, Жанубий Корея полицияси эса Юн Сок Ёлга давлат тўнтаришини ташкил этиш айби бўйича тергов бошлади.

Бу орада Жанубий Корея мудофаа вазири истеъфога чиқди ва ҳарбий ҳолат эълон қилиниши аҳолида “ташвиш ва хавотир уйғотгани” учун узр сўради. Шунингдек, президент администрацияси раҳбари ва яна 10 нафар юқори мартабали амалдор лавозимидан четлатилди.

Орадан икки кун ўтиб, Жанубий Корея мухолифат партияси Юн Сок Ёлга нисбатан импичмент жараёнини бошлади. Бироқ овоз бериш амалга ошмади, чунки ҳукмрон партия депутатларининг аксарияти мажлисни бойкот қилди.

Кейинчалик президент халққа мурожаат қилиб, бу қарорни “умидсизликдан” қабул қилганини айтди. Бошқа бир чиқишида эса импичмент бўйича овоз бериш ўтказилмагунча истеъфога чиқмаслигини билдирди. 14 декабрь куни парламент Юн Сок Ёлга импичмент эълон қилиш учун овоз берди, 31 декабрда эса суд унинг ҳибсга олиниши бўйича ордер чиқарди.

Бироқ январь ойи бошида полиция президентни ҳибсга ола олмади, чунки унинг юзлаб тарафдорлари ва хавфсизлик хизмати ходимлари терговчиларни унинг қароргоҳига киритмади. Кўп соатлик қарама-қаршиликдан сўнг, полиция ҳибсга олиш режасидан вақтинча воз кечишга мажбур бўлди. У фақат январь ўрталарида, иккинчи уринишдан сўнг ҳибсга олинди. Январь охирида прокуратура лавозимидан четлатилган президент Юн Сок Ёлга расмий айблов эълон қилди.