Yozuvchi sun’iy intellekt yordamida 370 dan ortiq kitob yozib, mln dollar ishladi

Janubiy afrikalik yozuvchi Koral Hart 2025 yil fevralidan buyon sun’iy intellekt yordamida 370 dan ortiq kitob nashr etdi. Uning asarlari millionlab nusxada sotildi, daromadi esa 1 million dollardan oshgan. Bu haqda “African news” nashri xabar berdi.

Ma’lumotlarga ko‘ra, Koral Hart yozuvchining haqiqiy ismi emas, balki taxallusi. U sun’iy intellektdan foydalanishga qarshi bo‘lgan kishilarning tahdidlari va minglab g‘azabli xabarlaridan himoyalanish uchun o‘z ismini oshkor qilmaydi.

Yozuvchining aytishicha, sun’iy intellektdan foydalanishni boshlashidan oldin u 14 yil davomida nashriyot sohasida ishlagan va o‘nlab asarlarni mustaqil ravishda yozgan. U kitob yozish imkonini beradigan tizim ishlab chiqish uchun turli sun’iy intellekt modellarini o‘rganishga uch oy sarflagan.

“Men dialoglarni juda yaxshi yozadigan, ammo badiiy nasrda unchalik kuchli bo‘lmagan ChatGPT bilan ishlayman. Claude’da voqealar rivoji yaxshi shakllanadi, biroq u erotik mavzularda qiynaladi. Grok kabi boshqa modellar esa mutlaqo boshqarib bo‘lmaydigan bo‘lsa-da, ehtirosli sahnalarni yozishda yaxshi”, deya tushuntirgan Koral Hart.

Yozuvchi avval asarning asosiy g‘oyasi, uslubi, qahramonlar tafsilotlari va boblar tuzilishini o‘zi belgilaydi. Shundan keyingina sun’iy intellekt tizimi kitob matnini yaratadi. Uning romanlaridan biri hatto Amazon platformasidagi eng ko‘p sotilgan 100 ta kitob qatoriga kirgan.

Hartning o‘z hisob-kitoblariga ko‘ra, u elektron, bosma va audiokitob formatlarida jami bir milliondan ortiq nusxa sotgan. Joriy yilning o‘zida esa uning daromadi 1 million dollardan oshgan. Bu taxminan 11 milliard 947 million o‘zbek so‘miga teng.

Shunga qaramay, yozuvchi sun’iy intellektdan foydalanish usuli sababli tanqid va tahdidlarga duch kelmoqda. U esa texnologiya yordamida kitob yozish yondashuvini himoya qilishda davom etmoqda.