Европаликларнинг катта қисми Украинанинг ЕИга қўшилишига қарши – ОАВ

Европа аҳолисининг 53 фоизи Украина келгуси йилларда Европа Иттифоқига қабул қилинмаслиги керак деб ҳисоблайди. Бу ҳақда “Bild” нашри хабар берди.

Украинанинг Европа Иттифоқига қўшилишига қаршилик Руминиядаги аҳолининг 60 фоизини, Германиядаги аҳолининг 59 фоизини, Польшадаги аҳолинг эса 57 фоизини ташкил қилади. Энг паст қаршилик Швецияда қайд этилган ва у ерда аҳолинг 30 фоизи ушбу тезлаштиришга қарши чиққан. Шунингдек, Испанияда бу кўрсатгич 37 фоизни, Нидерландияда 43 фоизни ташкил этган. Украинанинг ўзида аҳолининг 83 фоизи блокка тезроқ қўшилишни ёқлаб чиққан.

Украиналикларнинг аксарияти Россия босқинига қарши мамлакатни Европа Иттифоқи билан биргаликда ҳимоя қилишни устун кўрган аммо, европаликларнинг катта қисми ушбу жангда блокни ҳимоя қилишда Украинанинг ҳиссаси камроқ эканлигини айтган. Сўровномада иштирок этган европаликларнинг бешдан бир қисми иккала томоннинг ҳаракатлари тенг деб ҳисоблаган. Шунингдек, аҳолининг 16 фоизи Украинани асосий ҳимоячи деб билади. Сўровномада иштирок этган европаликларнинг атиги 14 фоизи “Украинанинг аъзолиги Европа Иттифоқини кучлироқ қилади ва унинг глобал саҳнадаги таъсирини оширади”, деб ҳисоблайди.

Маълумот учун, Украина 2022 йилда Европа Иттифоқига қўшилиш учун номзод бўлган. Киев Россиянинг босқинидан сўнг дарҳол ташкилотга қўшилиш учун ариза топширган. Қўшилиш бўйича музокаралар 2024 йил июнь ойида бошланган, аммо Виктор Орбан бошчилигидаги Венгрия ҳукумати бунга қаршилик қилиб келган. Бу орқали Славян давлатининг иттифоққа қўшилиши узоқ вақт давомида тўсиб қўйилган эди. Жорий йилнинг майида сайланган янги Бош вазир Петер Мадьяр Венгриянинг ушбу масаладаги муносабатини ўзгартирди. У Европа Иттифоқини “Украинанинг блокка тезкор қўшилиши” атамасидан воз кечишига эришди.

“Акс холда бу кўп йиллар давомида Европа Иттифоқига аъзо бўлиш учун ҳаракат қилиб келаётган Ғарбий Болқон мамлакатларига нотўғри сигнал юборади ва улар ҳам тезкор қўшилишга ҳаракат қилишади”, деб айтган Мадьяр.

Украина Президенти Владимир Зеленский мамлакатнинг Европа Иттифоқига аъзо бўлиш жараёнини 2027 йилга қадар якунлашга чақирган.

“Бу Украина ва Европа учун хавфсизликнинг асосий кафолати бўлишини”, деб айтган у.

Бироқ иттифоқдаги кўпчилик ушбу “шошқалоқликка” қаршилигича қолмоқда. Иттифоқнинг Украинадаги элчиси Катарина Матернова Украина 2030 йилгача иттифоққа қўшилишини айтиб ўтган.

Эслатиб ўтамиз, аввалроқ АҚШ ва Украина расмийлари томонидан Брюссель кўмагида музокаралар олиб борилаётган тинчлик таклифининг сўнгги лойиҳасида 2027 йил 1 январгача мамлакат Европа Иттифоқига аъзо бўлиш кўрсатилгани ҳақида хабар берилган эди.

Жўраев Шаҳриёр