Ёш қизлар қандай қилиб Эпштейннинг чангалига тушган?

Моделлик скаутлари дунё бўйлаб янги чеҳраларни излаш жараёнида бирин-кетин йўллаган электрон хатларида ўз янгиликларини кутилмаган бир шахс – ушбу соҳада ҳеч қандай расмий лавозимга эга бўлмаган, жинсий жиноятларда айбланган Жеффри Эпштейн билан баҳам кўрган. Бу ҳақда CNN хабар берди.

Нашрнинг ёзишича, скаутлардан бири моделликка номзодлардан бирини Эпштейнга “сиз билан учрашишдан хурсанд бўладиган ширингина француз қизи” дея мақтаган ва Скандинавиядан бўлган 16-17 ёшли потенциал моделлар гуруҳи “кейинги йилга тайёр бўлишини” айтган. Бошқа бир рекрутер эса “саёҳатга тайёр” бўлган 19 ёшли россиялик қизни тавсия қилган, яна бири эса ёш моделни “энг яхши қиз” дея кўкларга кўтарган.

“У мен сизга беришни режалаштириб юрган совғам”, деб ёзган рекрутер.

Обрўсизланган молиячи билан алоқада бўлганлар фақат ушбу профессионаллар билангина чекланиб қолмаган. CNN АҚШ Адлия вазирлиги томонидан эълон қилинган кўплаб ҳужжатларни ўрганиб чиқиб, Эпштейн ва моделлик индустрияси инсайдерлари, жумладан, агентлик раҳбарлари, маъмурлар ва рекрутерлар ўртасидаги алоқаларнинг кўламига доир янги тафсилотларни аниқлаган.

Ҳужжатлар жинсий жиноятчи ва дунё миқёсидаги ушбу соҳанинг айрим вакиллари ўртасидаги ўзаро манфаатли муносабатларни кўрсатади: Эпштейн пул, профессионал алоқалар ва АҚШ визасини олишда ёрдам берган, моделлик соҳаси ходимлари эса уни ёш, хорижлик аёллар билан таъминлаган – уларнинг аксарияти ҳозирда Эпштейн томонидан жинсий зўравонликка учраганини айтмоқда.

Ҳатто Эпштейн 2008 йилда жинсий жиноятларда айбдор деб топилганидан кейин ҳам, моделлик соҳаси инсайдерлари у билан қўшма бизнес лойиҳаларини бошлаш йўлларини излашда давом этган, уни мода намойишларига таклиф қилишган ва ўз компаниялари билан ҳамкорлик қилишига рухсат берган. Бу эса Эпштейнга у ўлжа сифатида нишонга олган моделларнинг карьерасини белгилаб бера оладиган нуфузли раҳбар қиёфасини тақдим этган.

CNN кўриб чиққан электрон хатлар шуни кўрсатадики, соҳанинг камида олти нафар таниқли вакили рўйхатда турган жинсий жиноятчини ёш моделлар билан боғлашга қайта-қайта уринган. Уларнинг айрим хабарларида жинсий ишоралар мавжуд бўлса, бошқалари оддий касбий тавсиялардек кўринган. Ҳужжатлар, шунингдек, кўплаб бошқа инсайдерлар ҳам Эпштейн билан дўстона ёзишмалар олиб борганини кўрсатади.

Эпштейннинг айрим шерикларига нисбатан жиноий айбловлар қўйилган, улар орасида молиячининг таниқли қурбонларидан бири томонидан зўравонликда айбланган франциялик моделлик агенти Жан-Люк Брюнель ҳам бор. Брюнель 2008 йилда вояга етмаганларни зўрлаганлик айби билан ҳибсга олинганидан кейин, 2022 йилда Париж қамоқхонасида ўз жонига қасд қилган. У айбловларни рад этган.

Адлия вазирлиги ҳужжатларида номлари келтирилган бошқа моделлик инсайдерлари ҳеч қандай қонунбузарликда айбланмаган ва улар Эпштейннинг жиноятларидан бехабар бўлганликларини даъво қилган. Кўпчилик Эпштейнни мода оламида қонуний ва нуфузли шахс деб билганини, бунга унинг Victoria’s Secret брендининг собиқ эгаси билан алоқалари сабаб бўлганини айтган.

Даниэль Сиад исмли профессионал моделлар рекрутери Эпштейнни бир нечта моделлар билан учраштиришни ташкиллаштириб берган – улардан икки нафари CNN’га Эпштейн уларни зўрлаганини айтган. Сиад берган интервьюсида ушбу аёлларга зарар етказилаётганига ишониш учун унда ҳеч қандай асос бўлмаганини таъкидлаган. Сиаднинг сўзларига кўра, Эпштейн уни ўз жиноятлари учун жазосини ўтаб бўлганига ва у тавсия қилган “ҳеч бир инсон билан бундай ҳолат такрорланмаслигига” ишонтирган.

“Мен унга таништирган ва кейинчалик ёнимга қайтиб, ёмон вазиятга тушиб қолганини айтган бирорта ҳам одамдан бундай гап эшитмаганман. Мен бу одамни профессионал шахс деб ҳисоблагандим”, дейди Сиад.

Бироқ Адлия вазирлиги ҳужжатлари Сиад Эпштейнга ёш аёлларни шунчаки моделлик имкониятлари учун тавсия қилмаганини кўрсатмоқда. 2018 йилдаги хабарлардан бирида у Эпштейн учун “келишган ёш ёрдамчи қиз” қидираётганини ёзган. Шунингдек, у ўз саёҳатлари давомида учратган ёш аёлларнинг суратларини, жумладан, уларнинг баъзи беҳаё суратларини ҳам Эпштейнга мунтазам равишда юбориб турган.

Сиаднинг бугунги кунда фикр билдиришича, Эпштейн уни алдаган “хамелеон” бўлган. У Эпштейн ўзига кастинг директори сифатида таништирилганини ва Эпштейн ундан алоҳида тарзда ёрдамчи топишда кўмак сўраганини билдирган.

Эпштейннинг ушбу соҳа билан алоқалари ҳозирда қонун чиқарувчилар ва ҳуқуқни муҳофаза қилиш органлари, жумладан, Париж бош прокурорининг сўзларига кўра, жорий йилда Парижда бошланган ва Сиадга тегишли маълумотларни ўрганаётган жиноий суриштирувнинг бир қисми ҳисобланади. Икки нафар собиқ модел CNN’га у ердаги терговчиларга Сиад ҳақида кўрсатма берганликларини маълум қилган, Сиаднинг ўзи эса қонунбузарлик қилганини рад этмоқда.

Эслатиб ўтамиз, аввалроқ Билл Гейтс Конгрессдаги кўрсатмасида Жеффри Эпштейн уни никоҳдан ташқари муносабатлари ҳақидаги маълумотлар орқали босим остига олганини билдирганди.